قال الإعلامي والكاتب الصحفي محمد الباز، إن الإعلامية مها الصغير ليست حرامية، ولم تسرق اللوحات الأربعة وادعت إنها هي التي قامت برسمهم.
وأضاف الباز خلال تدوينة له عبر صفحته على فيسبوك: «مها الصغير في الغالب بتعاني من اضطراب نفسى حاد، وربما ذلك بسبب الظروف اللي مرت بيها من حالة اهتزاز في ثقتها بنفسها، العالم من حواليها انهار تقريبا».
وتابع الباز: «وممكن جدا تكون بتعاني من هلوسات خيّلت لها إنها فعلا رسمت اللوحات دي، لأن حتى اللي بيسرق لوحات بيغير شوية من ملامحها، لكن يجيبها ويقول دي بتاعتي، فده جنون كامل».
وأكمل الإعلامي: «لأن حالة الانفتاح اللي بيعيشها العالم تخلي أي سرقة تتكشف بسهولة، فمفيش حد هيعرض نفسه لأزمة زي دي وهو في كامل قواه العقلية».
وأوضح: «بيتهيألي الموضوع محتاج تحليل نفسي، فلو فيه حد من خبراء الطب النفسى يقول لنا إيه الحالة دي يبقى كتر خيره، اللى بقوله ده لا ينفي طبعا إننا قدام عملية سطو وخطأ كبير وسقطة مدوية».
وكانت الإعلامية مها الصغير طليقة الفنان أحمد السقا، اعتذرت عن واقعة سرقة لوحة فنانة دنماركية.
وقالت الصغير خلال تدوينة عبر صفحتها على فيسبوك: «أنا غلطت، غلطت في حق الفنانة الدانمركية ليزا وفي حق كل الفنانين وفي حق المنبر اللي اتكلمت منه، والأهم غلطت في حق نفسي».
وأضافت: «مروري بأصعب ظروف في حياتي لا يبرر لي ما حدث، أنا آسفة وزعلانة من نفسي».
