“مُفتاح المُكالمة 218”
نُص كيلو جِبنة رومي
نُص كيلو لِب سوبر
وابعتي صور العيال
خَلّي عبده يخش ثانوي حتى لو بِعتي العِزال
هو إي الفلاح يساوي غير عَلام ابْنُه و أرضُه؟
لسه يا ابن الكلب ليك في الشِعر برضو؟
لو سامعني خلّي بالك من مكاني
يابني إنت مرايتي إللي بشوفني فيها
اللي يِتْلَفْ إبنُه.. يتهد في ثواني
واللي يِتْلَفْ.. إبنُه يتهد في ثواني
_يومها ليه ماسمعتنيش ومشيت بسرعة؟
يعني كان لازم تسيب في القلب زَعْلَة؟
_يا ام عبده غصب عنّي
الجنيه كان صوته أعلى
خدت بالي من صدى الصوت في المُكالمة
إنتي شكْلِك قاعدة في أوضْة الخزين
لسه فاضل قد إيه من قمح بكرة؟
لسه برميل الدقيق فاضي وحزين؟
_يومها ليه ماسمعتنيش ومشيت بسرعة؟
كل مرّة كنت بتقولّي هسافر
تتحرق لَمبة من اللمبات في بيتنا
أعمل ايه لو يوم قالولي وانت غايب
_يمَّه فيه في الأوضة فار
_يا ام عبده غصب عني
يومها ماسمعتش لصوتِك في الحقيقة
بس يومها لمحت صورتِك ع الدولار
واد يا عبده..
البلد أخبارها إيه طمِّنّي عنْها
_يابا بَعدَك الحاجات وقفت مكانها
هي بس الأجزخانة فيها أزمة
ما انت كان لك كِيف في فوّار الحموضة
زي ما تقول انت كنت شِريك بنسبة
آه صحيح ونسيت اقولك بالمناسبة
لسه بمسح وِشّي في الجلاليب بتاعتَك
كنت بستهبل واقول الفوطة ضايعة
كنت بمسح غلطي وذنوبي في عبايتك
إمتى بس هروح اجيبك م المطار؟
يابا في غيابَك بَشمَّر إيد قَميصي
والعيال اصحابي تِتَّريَق عليّا
وانت مين غِيرَك هيربُطلي الزُرار؟
طب هقولَّك..
الحُمار اللي انت كنت بتركَبُه
عُمْرُه ما في يوم اشتكى لحظةْ وجودَك
بس لما مشيت يا ابويا
اتقطم ضهر الحُمار
