العمل السياسي مش مقاعد بتتحسب ولا ألقاب بتترفع ولا شعارات بتتردد في الهوا، العمل السياسي وعي بالمشهد وفهم أعمق لما بين السطور وقدرة على اتخاذ القرار في اللحظة اللي تسبق غيرك بخطوة.
السياسة مش سباق على الأضواء ولا ساحة استعراض السياسة صراع إرادات وأفكار لعبة وعي وقوة حضور ولو ما فهمتش قواعدها هتفضل تلف في فلك غيرك وانت مش واخد بالك .
فيه نوعين من السياسيين
- واحد عايش جوه الحدث بيتأثر بيه
- والتاني هو اللي بيصنع الحدث ويعيد رسم المشهد من جديد
الأول بيتحرك برد الفعل والتاني بيقود الفعل نفسه السياسي اللي ما عندوش مشروع بيعيش تابع مهما علا صوته، لكن صاحب الرؤية هو اللي بيكتب السطر الأول في القصة مش اللي يقرا سطور كتبها غيره.
الزمن اتغير السياسة بقت دلوقتي صراع بين أفكار ومشروعات قبل ما تكون صراع على مقاعد أو ألقاب، واللي ما يفهمش المعادلة دي هيفضل رقم مهمش مالوش قيمة، أما اللي معاه أدوات التأثير فهو اللي بيفرض وجوده حتى لو محدش دعاه العمل السياسي الحقيقي مش معركة قصيرة ولا موقف لحظي ده صناعة مسار طويل المدى وبناء وعي يسبق قرارات السلطة وصراعات النفوذ.
السياسة ما بتحترمش اللي واقف في النص ولا بتستنى اللي بيجري ورا الضوء يا تصنع المشهد يا تلاقي نفسك بره المشهد كله والسياسي مش حضوره في الاجتماعات ولا صورته قدام الكاميرات السياسي الحقيقي أفكاره سياساته ورؤيته الرؤية اللي تتحول لناس بيشتغلوا عليها بيؤمنوا بيها وبيوصلوها للناس بمصداقية.
السياسة مش كلام السياسة رفع وعي وتحريك شارع وتجهيز الناس لفهم متطلبات المرحلة الجاية عشان تتحول الفكرة لقوة والرؤية لواقع.
