كشفت نصوص التحقيقات التي أُجريت مع صبري نخنوخ عن تفاصيل تتعلق بمصادر ثروته، وعلاقاته السياسية، وامتلاكه حيوانات مفترسة، إلى جانب طبيعة علاقاته بالفنانين وعدد من الاتهامات التي وُجهت إليه، وذلك من خلال سلسلة من الأسئلة والأجوبة التي أدلى بها أمام جهات التحقيق.
من أين لك هذا؟
“أنا راجل بيشتغل في التجارة وتحديدًا في الآلات الزراعية ويمتلك شركة مقاولات ومحال تجارية خاصة في منطقتي السبتية والقللي.. والفيلا اللي بتاعة إسكندرية بنيتها على مساحة 5000 متر مربع.. وفيها جناح خاص للنوم مساحته 350 متر.
إيه علاقتك بالحزب الوطني وحبيب العادلي وأحمد عز وموقعة الجمل؟
“علاقتي برموز الحزب الوطني كانت لأهداف وطنية أهمها الاستقرار.. وكان بيتولى عمليات نقل الناخبين بالميكروباصات للجان ومنع المعارضين من الوصول ليها.. وكنت بعمل ده مجانًا بدون أي مقابل مالي.. أما علاقتي بحبيب العادلي ماكنتش لنشر البلطجة زي ما الصحف والفضائيات بتتهمني، أما بقى قصة موقعة الجمل ومشاركتي فيها فدي كانت إشاعة وأنا كنت في المستشفى”.
إيه قصة الأسود والحيوانات المفترسة في بيتك؟
“أنا والله يا جماعة في البداية اشتريت أنثيين وذكر من الأسود.. وحصل ولف بينهم وأنجبوا وبقي عندي 10 أسود.. وأنا عندي هواية الحيوانات المفترسة جدًا.. علشان كده في مرة اقتنيت ثعبان نادر وكلاب حراسة شرسة من سلالات مختلفة وإسطبل خيول.. وحمير علشان أأكل الأسود”.
إيه علاقتك بلبنان وليه سافرت هناك؟
“أنا يا جماعة سافرت لبنان علشان أشتري مزرعة هناك وأعمل بيزنيس.. ثم رجعت مصر.. وهرجع تاني لبنان علشان أفتح شركة تجارية هناك، ثم تزوجت لبنانية”.
ليه بتحيط بيك فتيات وبيتم اتهامك بإدارة شبكة دعارة؟
“اللي بيكونوا عندي دول بنات بيحبوا التمثيل وبييجوا عندي علشان عاوزين مني أتوسط ليهم عند المنتجين علشان يمنحوهم فرصة لدخول الوسط الفني.”
إيه سر علاقاتك الوطيدة بكبار الفنانين؟
“أنا راجل محترم ومش بلطجي.. أنا كنت نصير الغلابة.. علشان كده علاقتي جيدة بالممثلين والممثلات في الوسط الفني لأني بحب الفن والسهرات والحفلات وكنت بعمل حفلات في فيلتي طول الوقت.. وأنا علاقتي جيدة بفيفي عبده ومصطفى كامل وسعد الصغير ومدحت صالح وأحمد السقا وأحمد رزق.”
إيه شعورك دلوقتي بعد القبض عليك وقائمة التهم الموجهة ليك؟
“أنا مصدوم.”
وتعد هذه الأقوال جزءًا مما ورد بمحاضر التحقيق، بينما تظل الوقائع محل نظر الجهات القضائية المختصة وفقًا للإجراءات القانونية المعمول بها.
