وجهت إحدى معلمات الدفعة الخامسة من مسابقة الـ72 ألف معلم، مناشدة إلى الرئيس عبد الفتاح السيسي، مطالبة بالتدخل بعد استبعادها وزملائها من المسابقة، مؤكدة أنهم اجتازوا مراحل الاختبارات التي خضعوا لها، كما طالبت بالكشف عن أسباب الاستبعاد.
«شكراً للأكاديمية العسكرية والقادة اللي قابلونا»
بدأت المعلمة مناشدتها بتوجيه الشكر إلى الرئيس عبد الفتاح السيسي، قائلة: «أولاً حابة أشكر حضرتك جداً يا فندم على تصريح حضرتك العظيم أن الأكاديمية العسكرية هي معبر الوصول للوظائف الحكومية».
وأضافت: «شكراً جداً يا فندم، حابين نشكر الأكاديمية العسكرية من خلال سيادتك، بنقدم لهم ألف تحية ونقول لهم: تحيا مصر، تحيا مصر، بجنودها العظام الشرفاء أمثالكم».
وتابعت: «إحنا ما كانش في أحلامنا إن إحنا نقابل القادة زي اللي قابلناهم في الأكاديمية العسكرية، كمية الانضباط والأمل والتفاؤل اللي على وشوشهم، حاجة تطمئن إن حضرتك على أرض مصر».
وأضافت موجهة الشكر إلى الأكاديمية: «شكراً جداً للأكاديمية العسكرية من أول العسكري اللي قابلنا على البوابة لحد القادة العظام اللي قابلونا في الهيئة، شكراً جزيلاً».
«شكراً لرئيس الوزراء ووزير التربية والتعليم»
كما وجهت الشكر إلى الدكتور مصطفى مدبولي، رئيس مجلس الوزراء، قائلة: «شكراً الدكتور مصطفى مدبولي إنه صرح وقال إن إحنا هنعين 72 ألف معلم ومعلمة دفعة واحدة لأن البلد في احتياج شديد».
وأضافت: «وصرح إنه بالاتفاق مع وزارة المالية هيتم تعيين 72 ألف معلم دفعة واحدة».
كما وجهت الشكر إلى محمد عبد اللطيف، وزير التربية والتعليم، قائلة: «رابعاً: شكراً لمحمد عبد اللطيف وزير التربية والتعليم على جهوده الطيبة في النهوض بالعملية التعليمية».
«اجتزنا التنظيم والإدارة والطبي والرياضي والهيئة»
وانتقلت المعلمة إلى مناشدتها للرئيس، قائلة: «إحنا بنستغيث بسيادتك يا فخامة رئيس الجمهورية إن حضرتك تنظر إلينا بعين الرحمة».
وأضافت: «إحنا معلمي ومعلمات الدفعة الخامسة المستبعدين بدون أسباب يا فندم، حضرتك الشروط كانت واضحة من بداية المسابقة، إن إحنا نجتاز التنظيم والإدارة، ثم نجتاز طبي، ثم رياضي، ثم وصولاً للهيئة»، وأكدت علي أنهم بالفعل نجحوا في هذا، نجحوا تنظيم وإدارة».
«عملنا ريجيم سنة كاملة عشان نوصل للوزن المثالي»
وقالت المعلمة: «عملنا ريجيم سنة كاملة عشان نقدر نوصل للوزن المثالي المسموح بيه»، مضيفة أن الوصول للوزن المثالي كان أصعب شروط المسابقة لأن كل كيلو فوق الوزن المثالي كان بيعرضهم لنقص درجة.
وتابعت: «كنا حريصين جداً على الوصول للوزن المثالي، على الرغم من إن ده أرهقنا جداً جسمانياً ومادياً».
وأوضحت: «اضطرينا ناخد أدوية إحنا عارفين إنها خطر على صحتنا أملاً في التعيين يا فندم».
«بقالنا سنتين بنجاهد عشان نوصل لحلمنا»
وقالت: «إحنا بقالنا سنتين، المسابقة تم الإعلان عنها في شهر 2 لسنة 2025، إحنا بقالنا سنتين بنجاهد عشان نوصل لحلمنا يا فندم»، مضيفة أنهم في النهاية اكتشفوا أنهم مستبعدين بدون أسباب.
ووجهت مناشدة إلى المسؤولين قائلة: «بنستغيث بحضرتك ياريس ، بنستغيث بالدكتور مصطفى مدبولي رئيس الوزراء، بنستغيث محمد عبد اللطيف وزير التربية والتعليم إن حضراتكم تلاقولنا حل علشان يتم قبولنا»، مؤكدة أنهم بالفعل ناجحين في كل المراحل وبشهادة القادة اللي الرئيس صرح إنهم معبر الوظائف الحكومية».
«القادة أثنوا علينا وقالولنا مبروك»
وقالت المعلمة: «هم أثنوا علينا وقالولنا مبروك يا فندم زي ما حضرتك صرحت إنهم اللي هيختاروا، وهم بالفعل اختارونا».
وأضافت: «تم اختيار 72 ألف معلم من الأكاديمية العسكرية عشان يشغلوا المناصب اللي موجودة في المدارس في جميع التخصصات، وفوجئنا يا فندم باستبعاد 30 ألف معلم».
«المدارس فيها عجز صارخ لا يقل عن 450 ألف»
وتابعت: «عايزين نقول لحضرتك ياريس إن المدارس فيها عجز صارخ لا يقل عن 450 ألف معلم ومعلمة في جميع التخصصات»، مضيفة أن البلد في حاجة إلي معلمين، وفي النهاية يتم استبعاد الناجحين.
«إزاي مفيش عجز وبعدها نحتاج مدرسين بالحصة؟»
وقالت المعلمة إن محمد عبد اللطيف، وزير التربية والتعليم، أخرج تصريحًا، أن «بعد الـ42 ألف البلد ما فيهاش عجز معلمين».
وأضافت: «اتفاجئنا بعدها بتلات أيام أنه يصرح إن البلد في احتياج لمعلمي ومعلمات بالحصة».
وتابعت متسائلة: «إزاي أنا هكون ناجح بأمر الأكاديمية العسكرية زي ما حضرتك صرحت يا فندم ويتم استبعادي بدون أسباب، و الدكتور محمد عبد اللطيف يعلن عن الاستعانة بالحصة، وكأنه بيستهزئ بينا يا فندم؟».
«إحنا لينا حقوق»
ووجهت رسالة إلى من يطالبون المتقدمين بعدم المطالبة بحقوقهم، قائلة: «رسالة أخيرة لكل الناس اللي بتقولنا، بلاش ما تنادوش بحقكم، مالكوش حقوق، لا إحنا لينا حقوق».
وأضافت قائلة: «إحنا بقالنا سنتين بنمتحن، اجتزنا كل الاختبارات كما نص عليها القانون والدستور إن من حقنا نتعين طالما اجتزنا كل الاختبارات المشروطة وحققنا كل الضوابط».
وأكدت: « ماحدش يقولي مالكش حق، لا أنا ليا حق، أنا ليا حق في بلدي».
«دمرنا صحتنا عشان نوصل للوزن المثالي»
وقالت: «لما ندمر صحتنا وناخد مونجارو وغيره وغيره من الأدوية علشان نوصل للوزن المثالي، إذاً إحنا في احتياج يا فندم للوظيفة».
وأضافت: «لو أنا وغيري من الـ30 ألف معلم ما كناش محتاجينها، ما أعتقدش إن كانت هتفرق معانا».
وتابعت: «إحنا فعلاً ظروفنا صعبة جداً، كنا بنحلم بالاستقرار الوظيفي عشان يساعدنا على ظروف المعيشة، وحضرتك عارف الغلاء اللي موجود في الأسعار وكل يوم بيزيد عن اللي قبله».
ملحق لنتيجة الدفعة الخامسة
واختتمت المعلمة مناشدتها قائلة: «أرجو من الرئيس عبد الفتاح السيسي بعمل ملحق لنتيجة الدفعة الخامسة وقبول تعيين الـ30 ألف معلم المستبعدين، خاصةً أنهم اجتازوا جميع الاختبارات في ظل وجود هذا العجز الصارخ في التربية والتعليم».
