ناشدت إحدى المتضررات من الدفعة الخامسة بمسابقة المعلمين الرئيس عبد الفتاح السيسي، النظر إلى موقف المستبعدين من الدفعة الخامسة، مؤكدة أنها لا تعرف حتى الآن سبب استبعادها من المسابقة، رغم تأكيدها اجتيازها جميع مراحل الاختبارات.
وقالت المتضررة: «أنا أناشد فخامة الرئيس عبد الفتاح السيسي إنه ينظر إلى الدفعة الخامسة بعين الرحمة، إحنا المستبعدين من الدفعة الخامسة، وإحنا مش عارفين لحد دلوقتي أي سبب من الأسباب اللي جعلتنا إن إحنا نستبعد من المسابقة».
«الـ3 كيلو زيادة نقصوني 3 درجات»
وأوضحت المتضررة أنها حصلت على 68 درجة في الوزن النوعي، بسبب زيادة 3 كيلو عن الوزن المثالي، قائلة: «أنا حضرتك جايبة 68 وزن نوعي.. الـ3 كيلو اللي أنا كنت زيادة فيهم عن المثالي نقصوني ثلاث درجات، يعني كان زماني جايبة 71 دلوقتي وأتعين زيي زي زمايلي.. فهل المعلم بيتوزن بالكيلو؟».
وأضافت: «إيه اللي هيعوقني في المدرسة إن أنا أمشي أو أجري؟ أنا ممكن أجري وأتنطط، أنا جسمي أو الـ3 كيلو الزيادة اللي عندي في جسمي مش بيعوقوني عن الحركة».
«عملت أقصى ما عندي في المسابقة»
وأكدت أنها بذلت أقصى ما لديها خلال مراحل المسابقة، قائلة: «أنا حضرتك جايبة (جيد) وعملت أقصى ما عندي، أقصى ما عندي عملته في المسابقة، كل حضرتك ما تتخيله عملناه، ما سبناش ولا قصرنا».
وتابعت قائلة مش أنا لوحدي، ما بتكلمش عن نفسي، وكل الدفعة الخامسة كذلك، كل اللي راحوا ووصلوا هيئة بذلوا أقصى ما عندهم عشان يوصلوا للمكانة دي، ما حدش فينا قصر.
«شغالة في مدرسة حكومي بقالي خمس سنين»
وأضافت قائلة: أنا واحدة من الناس شغالة في مدرسة حكومي بقالي خمس سنين شغال في المدرسة، والله ما بنكل ولا بنمل، اطلعي نطلع، انزلي انزلي، خشي حصص احتياطي بنخش حصص احتياطي.
وتابعت قائلة: إحنا عايزين حقنا، عايزين كرامتنا ترجع لنا، طب إحنا مين هيرجع لنا كرامتنا؟ لما أنا بعد خمس سنين في المدرسة بشتغل بالحصة وأروح يقولوا لي عملتي إيه في المسابقة؟ أقول لهم سقطت، ما نجحونيش، ما خدونيش».
«إزاي هنخش تظلمات وإحنا أصلاً ما سقطناش؟»
وتساءلت المتضررة عن سبب استبعادها هي وزملائها، قائلة: أنا عايزه أعرف إيه سبب استبعادي أنا وكل زمايلي، يعني إحنا إزاي هنخش تظلمات وإحنا أصلاً ما سقطناش؟ يعني ما نزلناش في أي حاجة، عملنا كل حاجة على أكمل وجه.
وأضافت قائلة: نفسنا حد يطلع يرد علينا يقول لنا سبب نزولكم و إحنا غير لائقين في المسابقة ليه، علشان حتى نحاول نتفاداه في التظلمات بتاعتنا.
«إحنا ناجحين.. فحرام مجهودنا وتعبنا»
وأكدت أن المتقدمين بذلوا مجهودًا كبيرًا خلال مراحل المسابقة، قائلة: إحنا ناجحين، إحنا الدفعة الخامسة نجحنا، حرام مجهودنا وتعبنا وشقانا وسهرنا ليالي طويلة، وجبنا بدلة وتعبنا، في فلوسها والله العظيم ربنا يعلم إحنا جبنا ووصلنا للي إحنا فيه ده بعد عناء قد إيه، وبعد أمل قد إيه كان عندنا أمل إن إحنا نفرح ويدخل بيتنا وقلبنا الفرحة، ولكن اتكسرنا.
«سنّي بقى 39 سنة، ما عنديش فرص تاني أخش مسابقات»
وتابعت المتضررة قائلة: خبرة وعندنا خبرة بدل السنة ستة، عندي سنة تطوع وخمسة عمل بالحصة، أعمل أكثر من كده إيه؟، سنّي بقى 39 سنة، ما عنديش فرص تاني أخش مسابقات، أديت للدولة من عمري خمس ست سنين، طب ليه الدولة ما تقدرنيش؟.
وأضافت قائلة: حضرتك بتطالب بنزول معلمين، الوزير بيطالب بنزول معلمين المدارس بالأجر وبالحصة وسايبنا إحنا؟ طب إحنا نجحنا، إحنا شفنا المرار.
«المدرسة اللي أنا شغالة فيها فيها عجز صارخ»
وأشارت إلى وجود عجز، في المدرسة التي تعمل بها، قائلة: يعني أنا المدرسة اللي أنا شغالة فيها فيها عجز صارخ، إحنا عندنا 12 معلم شغال لغة عربية في المدرسة،12 معلم لغة عربيةوعايزين تاني معلمين في المدرسة.
وتابعت قائلة: من حقنا إحنا كناس ناجحين وعدينا الاختبارات اللي حضرتك قلت “من يعبرها يتم تعيينه” في الكلية الحربية إن إحنا من حقنا إن هو يتم تعييننا.
«على استعداد إن إحنا نتعين العام القادم»
وأكدت المتضررة أنها لا تمانع في الانتظار والعمل بالحصة لمدة عام إضافي، قائلة: إحنا ما بنطالبش الدولة بأي حاجات يعني تبقى تتحمل الدولة أعباءنا، إحنا على استعداد إن إحنا نتعين العام القادم، وأن إحنا ننزل زي ما إحنا بالحصة في المدارس ونشيل المدارس سنة كمان مشيرة إلي أن يكون هناك أمل لتعينهم العام القادم مثل زملائهم الناجحين، لأنهم ناجحين مثلهم ولهم الحق في التعين.
«ليه إحنا نشعر بالظلم والقهر ده؟»
واختتمت المتضررة مناشدتها قائلة: ليه إحنا نشعر بالظلم والقهر ده؟، حرام والله إحنا إدينا الدولة من عمرنا كتير، كنا منتظرين الدولة إن هي تقدرنا، تقدر أبنائها.
اقرأ أيضًا.. أسماء حجازي تطالب بمراجعة موقف معلمي المرحلة الخامسة: لا نطلب استثناءً أو تجاوزًا للضوابط
