قالت الناقدة الفنية حنان أبو الضياء: مفيش أفلام كوميديه بتعيش دلوقتي، لأن الفيلم الكوميدي يعتمد على نص جيد ومجموعة من الممثلين ومخرج مهم زي الأفلام الكوميدية اللي قدمها فطين عبدالوهاب، ومجموعة أفلام إصسماعيل يس رغم إنها أفلام”بسيطة”.
وأضافت”أبو الضياء” خلال تصريحاتها لـ”الحرية”: كل الافلام اللي شاهدناها حتى “الممصرة” اللي قدمها”سمير غانم” وثلاثي أضواء المسرح وماجد المهندس، وكل الأعمال التي كانت تقدم كانت من البيئة فكانت أقرب للواقع حتى ولو “ممصرة” وبالتالي مكنتش محتاج ترمي إفيه عشان الجمهور يضحك.
وواصلت “أبو الضياء”: لو بصينا مثلًا على فيلم محامي خلع اللي عمله وحيد حامد اللي كتبه في شهر واحد، وكان تحدي إنه يقدم فيلم كوميدي تجاري بسيط في”شهر” لكنه بالفعل نجح، لإن الكوميديا نبعت من داخل الفيلم مش مقحمة عليه زي باقي الافلام وقتها.
واختمت: لو فعلًا محتاج عمل جيد تجيب ممثلين كويسين ونص قوي، لكن اللي بيحصل دلوقتي إنهم بيجيبوا إفيهات”أكل عليها الدهر وشرب” عشان اتقدمت اكتر من مرة قبل كدا زي فيلم”مرعي البريمو” إفيهات قديمة قدمها هنيدي قبل كده لكنه أعاد إستخدامها عشان كدا نوعية الأفلام دي مش بتنجح، لكن مثلًا أفلام “سمير وشهير وبهير، وحملة فريزر والحرب العالمية الثالثة” اللي قدمها الثلاثي احمد فهمي وهشام ماجد وشيكو أفلام اشتغلوا عليها عشان كدا نجحت.
وقال الناقد الفني أحمد النجار: الأفلام الكوميدي مبقتش زي الأول، لأن هناك أزمة في كتابة الأعمال الكوميدية بشكل عام، والساحة دلوقتي مفيهاش حد على نفس قدر وموهبة “العظماء” اللي كانوا على الساحة الفنية، زي “بديع خيري وأبو السعود الإبياري” وغيرهم من الكتاب المميزين اللي عدى عليهم ممثلين مميزين زي نجيب الريحاني و وإسماعيل يس وفؤاد المهندس.
وأضاف”النجار” من خلال تصريحاته لـ”الحرية”: لما جه يوسف معاطي قدم لعادل إمام كتاباته كان بالنسبة لعادل أمام نقلة في حتة تانية بعد شغل قوي مع وحيد حامد وغيرهم من الأسماء الكبيرة ، والافلام دلوقتي مش بتعيش لأنها قائمة على الاسكتشات والقفشات ومفيش مضمون.
وتابع”النجار” الأفلام الكوميدية بتاعت زمان حتى الخفيفة كنت تلاقي رسالة خاصة، اجتماعية أو وطنية زي سلسلة إسماعيل يس في الاسطول البحري و البوليس والطيران، وكانت الأفلام لها جودة وقيمة على عكس الافلام الحاليه ومن وقائع الفنانين المصريين” مره الرئيس جمال عبد الناصر كان بيزور المغرب وحد من المواطنين قاله سلملي على اسماعيل يس” فده يبين قوة وجودة الافلام والممثلين زمان، إذا فالحل في وجود كتاب كوميدين على أعلى جودة ومستوى.
