قال المحامي أحمد فوزي القيادي بالحزب المصري الديمقراطي الاجتماعي:” تم الإفراج، أمس، عن أحمد دومة بعفو رئاسي، وأصدرت النيابة قرارًا بالإفراج عن 27 محبوس احتياطي، وفي نفس اليوم أصدر قرار بالقبض على كريم أسعد صحفي وده كلام مؤكد، وفي كلام إنه اتقبض على 20 مواطن مابين صحفي وبين ناس لها علاقة بصفحة متصدقش إلى نشرت تفاصيل عن رحلة زامبيا المحيرة للجميع طب أيه بيودي لأيه“.
وأضاف فوزي خلال تدوينة له عبر موقع التواصل الاجتماعي فيسبوك: “هل مثلًا الناس المحبوسة دول بيبقوا عهدة ضروري أننا نسد في خانة الملفات مواطنين تانين مكانهم مثلًا، وهل من المفترض أننا نفضل في الدائرة دي طول عمرنا أحنا من سنة 2015 مفيش أي حد فى مصر بيمارس العمل العام أو كان بيمارسه وابتعد عنه أما أنه مش بيتكلم إلا فى أزمة واحدة وهي ناس بتتحبس والناس يا بتناشد يا تطالب يا بتنشر يا بتسترجى يا بتتفاوض يا بتزعق وبس علشان في ناس بتتحبس، علشان يا كتبت رأيها يا عبرت عن رأيها يا فى مواقف تانية مجرد عجبها رأي يعنى أحنا بقالنا 9 سنين كدا“.
وتابع: “يعني يا محبوسة يا منتظرة الحبس يا بتتفاوض يا بتتضامن يا متهددة بالحبس، ولجان عفو وناس وسيطة وحوار وطني، والناحية الثانية ناس قريبة من السلطة بتأكد أني إلي بيتقبض عليهم اشرار وإن فى خطوات إيجابية والملف هيتحل أو تبرر أو تصبر، الأجواء دي مفيش حد معها بيعمل أي مناقشة جادة أو حقيقية في أي مشاكل تانية تخص البلد الأزمة الاقتصادية والاجتماعية أي حاجة تانية، الموضوع بقى سخيف و ممل“.
