وجّه الإعلامي أحمد شوبير، عبر قناة الأهلي، ردًا حادًا على تصريحات الكابتن محمد عمارة، والتي تناولت أوضاع غرفة ملابس الأهلي وبعض صفقات الموسم الحالي.
وأكد شوبير أن الأمور داخل النادي لا تستدعي تلك الادعاءات، داعيًا الجميع إلى الحديث بالمعلومة وليس بالتأويلات.
قال شوبير: «أنا النهارده بتكلم بالأسماء.. الكابتن محمد عمارة محدش يقدر يختلف عليه كلاعب، بغض النظر عن رأيه». لكنه أوضح أن «في أمور يا كابتن مينفعشي».
وأضاف: «أنا هقولك صفقات الأهلي الموسم ده.. ضم محمود تريزيجيه، محمد بن رمضان، زيزو، سيحا، أحمد رمضان بيكهام، محمد شريف، وياسين مرعي، ورحل عمر الساعي، أكرم توفيق، رامي ربيعة، حمزة علاء، خالد عبدالفتاح، كريم الدبيس، وعمرو السولية، وانتهت رحلة علي معلول، وتمت إعارة يحيى عطية الله».
وتابع: «الأهلي خسر أفريقيا وبطولات الموسم الماضي، فكان زعلان وبدأ يدعم صفوفه بنجوم جدد زي زيزو وتريزيجيه، وحرص على استمرار وسام أبو علي».
ثم تساءل بنبرة استنكار: «فين بقى غرفة الملابس اللي مشتعلة دي؟ أنت لعبت مع أجيال عظيمة.. لو عندك معلومة أن أوضة اللبس مولعة قولنا. يعني زيزو دخل كسر حاجة؟ ولا تريزيجيه مسك المدرب ضربه؟ ووسام علّق حد؟».
وأكد أن «الاتهامات دي بتيجي من ناس عندها حالة حقد وغيرة وغل من الأهلي.. مش من أبناء الأهلي».
وأوضح أنه يتقبل النقد في الأداء مثل كأس العالم للأندية، لكنه لا يقبل التجاوزات: «ممكن يبقى عندك رأي إن الأهلي كان وحش في كأس العالم للأندية، مش هقولك حاجة.. لكن هو في إيه يا جماعة؟».
وختم شوبير حديثه قائلاً: «أنا النهارده عمال أدور على من قائل حكمة “اللهم احمني من أصدقائي، أما أعدائي فأنا كفيل بهم”. هذا الأمر ينطبق على الأمثلة اللي ذكرتها. وفي ناس مش هدي لهم عناء الرد، لأنه لا يستحق، لكن لما الموضوع يبقى الأهلي، هنا لازم وقفة، خصوصًا إن الناس دي أعضاء عاملين في الأهلي».
واختتم بقوله: «بالبلدي بقى، اللي ميشوفشي من الغربال يبقى أعمى».
