تحدث هشام يكن، نجم الزمالك ومنتخب مصر السابق، عن ملف بيع لاعبي الزمالك في توقيت إيقاف القيد، مؤكدًا أن التقارب الكبير في المستوى الفني بين لاعبي الدوري المصري يفرض على إدارات الأندية التعامل بعقلانية شديدة، خاصة في ظل الأزمات المالية.
اقرأ أيضا: القناة الناقلة لمباراة الزمالك وكهرباء الإسماعيلية في الدوري
هشام يكن كل لاعبي مصر بنفس المستوى
وقال يكن خلال تصريحات خاصة لموقع الحرية: “بغض النظر عن بيع اللاعبين في توقيت إيقاف القيد، الحقيقة إن كل اللاعبين الموجودين في مصر مستواهم قريب جدًا من بعض، ومفيش فروق فردية واضحة، وبالتالي مجلس الإدارة بيدير الأمور بالشكل اللي شايفه مناسب، لأنه في النهاية محتاج يوفر سيولة مالية علشان يقدر يصرف على الفريق”.
وأضاف نجم الزمالك السابق: “زمان كنا بنشوف لاعبين على أعلى مستوى في أندية كتير زي الأهلي والزمالك والاتحاد السكندري والمصري والإسماعيلي والمحلة والترسانة، وكانت الفروق الفردية واضحة جدًا بين لاعب ولاعب”.
وتابع: “في الزمالك تحديدًا كنا بنشوف أسماء كبيرة زي إبراهيم يوسف، أشرف قاسم، أحمد رمزي وغيرهم من النجوم اللي كانوا بيمثلوا قيمة فنية حقيقية داخل الملعب، إنما دلوقتي المستوى متقارب جدًا، ومفيش لاعب تقدر تقول عليه فارق بشكل واضح”.
وأكد هشام يكن أن جماهير الزمالك لا ترضى إلا بالمنافسة على البطولات، مشددًا على أهمية وجود اللاعب المؤثر، قائلًا: “إحنا عندنا جمهور عاشق للبطولات، وعايز الزمالك يفوز دايمًا، واسم النادي يبقى ملعلع في الوسط الرياضي، وعلشان كده لازم يكون عندك لاعب يعمل الفارق”.
وأوضح يكن أن الدوري المصري لا يضم لاعبًا سوبر حقيقيًا سوى إمام عاشور، مؤكدًا: “مفيش لاعب يتقارن بإمام عاشور في الدوري حاليًا، ومن حقه يكون أعلى لاعب قيمة، وهو شايف نفسه كده فعلًا، وإحنا مالناش دعوة بظروفه، لأنه في الأول والآخر أفضل لاعب في مصر”.
وأضاف: “أي لاعب طبيعي يفكر في مستقبله، لأنه بعد ما يعتزل ممكن الأضواء تروح، ومفيش حد بيلعب كورة بدون مقابل، لازم يأمّن نفسه علشان يعرف يعيش بعد الاعتزال”.
تغيير مفهوم الانتماء
وشدد نجم الزمالك السابق على أن مفهوم الانتماء تغيّر كثيرًا، قائلًا: “ماينفعش نقول ده ابن الأهلي وده ابن الزمالك، دلوقتي كله بيدور على الفلوس، ومجلس إدارة الزمالك لازم يوفر موارد مالية علشان يقدر يصرف ويكمل”.
واختتم هشام يكن تصريحاته بالإشادة بالجهاز الفني للفريق الأبيض مؤكدًا: “معتمد جمال أثبت إنه مدرب على قد المسؤولية، وقادر يقود نادي الزمالك في الفترة القادمة”.
