وجه الإعلامي أحمد موسى الشكر إلى الرئيس عبد الفتاح السيسي على تكريمه لبعثة المنتخب الوطني، مردفًا: «اللي حصل النهارده تقدير كبير جدًا، شوفنا تكريم المنتخب في العلمين، وهيكون في تكريم في القاهرة كمان ليهم».
أحمد موسى مش مهم نحتفل فين.. المهم نكرم الأبطال
وقال أحمد موسى، خلال تقديم برنامج «على مسئوليتي»، عبر قناة «صدى البلد»: «أيوه يا سيدي بنحتفل، بنحتفل برجالتنا عملوا إنجاز، إنت مالك يا سيدي، المنتخب الوطني أفضل منتخب عربي وأفريقي في المونديال».
وتابع: «شايف تعليقات على السوشيال ميديا، ليه خلوا الاحتفال في العلمين؟ طيب هي يا سيدي العلمين دي مش أرض مصرية وفيها مصريين، أنا في ناس كلمتني قالت لي: نروح إزاي العلمين؟ قلت لهم: خد العربية وروح، الناس راحت في درجة حرارة عالية علشان رجالتنا».
وأكمل: «العلمين تريند من إمبارح علشان التكريم ده، سي إن إن بتنقل الاحتفال من العلمين، إنت زعلان ليه؟ إنت مضايق ليه؟ إحنا عاملين مدينة حديثة متطورة، إنت ليه زعلان، مش مهم نحتفل فين، المهم نحتفل».
وأكمل: «اللي عملوه الرجالة ده تاريخ، هنحتفل النهارده وبكرة ولحد ما نروح أمم أفريقيا، إحنا المنتخب الوحيد اللي دهس الأرجنتين، رغم إنهم واخدين دعم من الصهاينة وشركات المراهنات، رغم الهزيمة، شوفوا هيثم حسن وصلاح وزيكو عملوا إيه في الأرجنتين، إحنا المنتخب الوحيد اللي خلّى ميسي يبكي».
وأردف أحمد موسى: «آخر ربع في المباراة لا يمت لكرة القدم بصلة، ده الرئيس السيسي كرم وسلم المنتخب كأس الفخر والاعتزاز، وبالمناسبة الكأس ده أهم من كأس العالم، افهم اللي عاوز تفهمه، إيه الهدف من الكأس».
اقرأ أيضاً.. ميسي على موعد مع التاريخ.. هدف واحد يفصل قائد الأرجنتين عن إنجاز لاتيني استثنائي في كأس العالم
