أنا فلاح ابن فلاح.. والأرض بالنسبة لي أصل وحكاية وانتماء
الدولة بدأت تنظر للأرض باعتبارها فرصة حقيقية للشباب
المشاركة في مجلس الشيوخ عن حزب مستقبل وطن عززت رؤيتي لتمكين الشباب
حاضنات جيل زد “بأبو غالب” تستهدف نقل فرص ريادة الأعمال إلى شباب المنطقة.. والمشروع يستهدف خلق فرص عمل حقيقية للشباب
“أبو غالب” منطقة واعدة وقريبة من مشروعات وتجمعات عمرانية جديدة.. والتنمية الحقيقية لا يمكن أن تتحقق بعيدًا عن أبناء المجتمع المحلي
حاضنات جيل زد تساعد أصحاب الأفكار على تحويلها إلى مشروعات قابلة للتنفيذ
أجرى الحوار- عصام الشريف
أعده للنشر- سيف رجب
في وقت تتجه فيه الدولة المصرية إلى تعظيم الاستفادة من الأرض، وفتح مسارات جديدة أمام الشباب للمشاركة في الاستثمار وصناعة المستقبل، تبرز أهمية النماذج التي تربط بين النجاح الاقتصادي والمسؤولية تجاه المجتمع.
ومن هذه الرؤية، أجرى موقع «الحرية» حوارًا خاصًا مع النائب عادل زيدان، عضو مجلس الشيوخ ورئيس مجلس إدارة أفرولاند لإدارة المشروعات، أحد النماذج البارزة في مجال الاستثمار، للحديث عن نشأته المرتبطة بالأرض باعتباره «فلاحًا ابن فلاح»، وكيف أسهمت هذه النشأة في تشكيل رؤيته للاستثمار والعمل، إلى جانب رؤيته لجهود الدولة في استصلاح الأراضي وتمكين الشباب، وتجربته في المشاركة السياسية من خلال مجلس الشيوخ عن حزب مستقبل وطن، وصولًا إلى مشروع «حاضنات جيل زد» ودوره في تحويل أفكار الشباب إلى مشروعات وفرص حقيقية.
ويؤكد زيدان أن الاستثمار لا يقاس بالعائد الاقتصادي وحده، وإنما بقدرته على صناعة أثر مستدام داخل المجتمع، معتبرًا أن رد الجميل لمصر لا يكون بالكلمات، وإنما بإتاحة الفرص أمام جيل جديد من الشباب، ودعمهم ليصبحوا أصحاب مشروعات وصناعًا للفرص، بما يسهم في بناء مستقبل الجمهورية الجديدة.
وإلى نص الحوار:
في البداية.. حدثنا عن نشأتك وعلاقتك بالأرض وكيف أثرت هذه النشأة في رؤيتك للاستثمار والعمل؟
أنا شخص وُلد من طين الأرض، والدي فلاح، وأنا بقولها بكل فخر: أنا فلاح ابن فلاح، واتربيت وسط الأرض وشوفت بعيني يعني إيه الإنسان يبني حياته من تعبه، ويزرع النهارده علشان يحصد بكرة.
أنا فرز الطبيعة، الأرض بالنسبة لي مش مجرد مصدر رزق، دي أصل وحكاية وانتماء، وعشان كده عمري ما شوفت الفلاحة على إنها حاجة لازم الواحد يخرج منها علشان ينجح، بالعكس، أنا شايف إن الفلاحة تقدر تخلي الإنسان رجل أعمال ومستثمر ناجح أكثر من أي مجال آخر، بشرط إننا نطوّر أدواتنا ونفكر بشكل مختلف.
وأنا ابن الجمهورية الجديدة؛ الجمهورية اللي آمنت إن الفلاح مش بس حد بيزرع ويحصد، لكن هو شريك أساسي في بناء البلد، فالجمهورية الجديدة كرمت الفلاح وأبناء الفلاحين، وفتحت لهم فرص إنهم يستثمروا في الأرض، ويطوروا شغلهم ويعملوا مشروعات حقيقية من غير ما يخرجوا من عباءة الفلاحة.
وأنا بحب الآية: «هُوَ أَنشَأَكُم مِّنَ الْأَرْضِ وَاسْتَعْمَرَكُمْ فِيهَا».. سورة هود، الآية 61.
وإحنا خلقنا في الأرض علشان نعمرها، وربنا قال: «هو أنشأكم من الأرض واستعمركم فيها»، وعمارة الأرض مش معناها مباني ومشروعات بس، لكن معناها كمان إننا نبني الإنسان، ونمكن الشباب، ونعلمهم إزاي يعملوا مشروعات تخدم مجتمعهم.
ما الذي أثر فيك من رؤية الدولة المصرية خلال السنوات الماضية.. خاصة فيما يتعلق بالأرض والزراعة وتمكين الشباب؟
اللي أثر فيا إن الدولة بدأت تبص للأرض باعتبارها فرصة حقيقية للشباب، مش مجرد مساحة بنزرعها وخلاص، وأنا آمنت برؤية الرئيس السيسي لما اتكلم عن تعمير الظهير الصحراوي، وعن التوسع في استصلاح الأراضي، وعن إن الزراعة لازم ترجع تكون رقم مهم في اقتصاد البلد وأمنها ومستقبلها.
شفنا مشروعات كبيرة لاستصلاح الأراضي، من بينها استصلاح ما يقرب من أربعة ونص مليون فدان، وإنشاء كيانات ومشروعات زي جهاز مستقبل مصر ومشروع الدلتا الجديدة، والأهم من حجم المشروعات هو الفكرة نفسها: إن الدولة بتفتح أبواب جديدة، وبتنقل التنمية من أماكن مكتظة إلى مناطق جديدة، وبتدي فرصة للشباب إنه يشتغل ويستثمر ويبني مستقبله.
والرسالة اللي وصلت لي كانت واضحة: الأرض موجودة، والفرصة موجودة، والشاب المصري قادر، لكن محتاج حد يفتح له الباب ويؤمن بيه ويسهّل له الطريق.
وأنا شفت شباب من محافظات مختلفة بيحاولوا يجتمعوا ويعملوا شركات، وشفت إن الفرصة ما بقتش مقصورة على فئة معينة أو محافظة معينة، شباب الدلتا والصعيد والوادي الجديد وسيناء كلهم عندهم نفس الحق في إنهم يشتغلوا ويستثمروا ويبنيوا مستقبلهم.
الدولة قدمت حلول وتسهيلات تساعد الشباب في الحصول على الأراضي من خلال أسعار مناسبة وأنظمة سداد أسهل علشان الشاب يقدر يبدأ من غير ما تكون كل الأبواب مقفولة في وشه.. وطبعًا أي تجربة فيها تحديات، لكن مجرد وجود فرصة حقيقية بيغيّر طريقة تفكير الناس.
الفكرة إن الشاب ما يبقاش مستني وظيفة وبس يبقى عنده أرض، أو مشروع، أو شركة، أو استثمار يقدر يكبره مع الوقت، وده بيحول الشباب من مجرد باحثين عن فرصة إلى صُناع فرص.
هنا نصل إلى السؤال الأهم.. ما علاقة هذه الرؤية بمشروع حاضنات جيل زد في أبو غالب؟
هتقولي إيه علاقة ده بمشروع حاضنات جيل زد في أبو غالب؟، الرئيس السيسي قال كده نصًا في إحدى لقاءاته: «الاستثمار في الشباب هو الاستثمار الحقيقي الذي يحقق عوائد مستقبلية ذات قيمة إنسانية وحضارية تتقدم بها الأمم وتزدهر».
وأنا شفت ده في تجربتي بنفسي، أُتيحت لي فرصة أكون بين المستثمرين الشباب، وأُتيحت لي فرصة المشاركة السياسية من خلال مجلس الشيوخ عن حزب مستقبل وطن، وسط شباب بيشارك وبيقود، علشان كده أنا شايف إن دوري دلوقتي إني أنقل الفرصة دي لشباب تاني، وأساعدهم يتعلموا ريادة الأعمال ويصنعوا فرصهم ويكملوا مسيرة التنمية في مجتمعهم المحلي.
وأنا شايف إن عندي دين للبلد، وسألت نفسي: أرده إزاي؟ لقيت إن أحسن طريقة إني أرده في شبابها، زي ما أنا أُتيحت لي فرصة، لازم أحاول أتيح فرصة لغيري، خصوصًا شباب المجتمع المحلي، وعلشان كده قررت إنشاء حاضنات جيل زد في منطقة أبو غالب، بمنشأة القناطر، بجوار أرضي في مدينة سفنكس الجديدة على طريق الإسكندرية الصحراوي.
والحاضنات دي مش مجرد مباني أو قاعات تعليمية أو خدمة للشباب، إحنا بنبص لها باعتبارها مشروع تنموي متكامل، يبدأ من الشباب، ويمتد لأسرته، ويخلق فرص عمل لشباب القرية والمنطقة المحيطة.
وأنا مؤمن إن كل مشروع لازم يكون له أثر يتجاوز صاحبه يعني المشروع ينجح، لكن في نفس الوقت ينجح معاه ناس تانية، يخلق فرصة، ويدرب شاب، ويشغل بنت وذوي الهمم، ويساعد أسرة، ويقدم خدمة محترمة للناس.
لماذا اخترت منطقة أبو غالب تحديدًا لإقامة مشروع حاضنات جيل زد؟ وما الذي وجدته في المنطقة؟
أبو غالب منطقة مهمة جدًا، وقريبة من مشروعات وتجمعات عمرانية جديدة زي سفنكس الجديدة، والمنطقة فيها ناس عندها طموح وفيها شباب عنده طاقة لكن محتاج مشروعات حقيقية تفتح له باب.
كل ده أثر فيا، وأثر في رؤيتي، وأثر في طريقة تفكيري واستثماراتي، وأنا استفدت من توجه آمن إن الأرض والشباب هما أساس المستقبل، ولما الواحد يستفيد من بلده، بيبقى عليه واجب إنه يرد الجميل.
هل ترى أن التنمية الحقيقية يمكن أن تتحقق بعيدًا عن أبناء المجتمع المحلي؟
أنا شايف إن التنمية ما ينفعش تحصل بعيد عن أهل المكان، مينفعش نعمل مشروع في منطقة ونجيب كل العاملين فيه من بره ونسيب شباب المنطقة واقف يتفرج)، فالأصل إن المجتمع المحلي يكون شريك في التنمية، يستفيد منها، ويتعلم منها، ويكون له دور فيها.
واختيار أبو غالب نابع من إيماني إن المناطق القريبة من المشروعات الجديدة لازم تستفيد، وإن شباب القرى المحيطة لازم يكون عنده نصيب من الفرص، ومشروع حاضنات جيل زد هو خطوة في الاتجاه ده، ونتمنى إنه يكون بداية لخطوات أكبر.
والمشروع هيحتاج إلى شباب وشابات من المنطقة في مجالات مختلفة: التعليم، والإدارة، والتدريب، والخدمات، والتشغيل وريادة الأعمال، وده معناه إننا بنستثمر في الإنسان المحلي قبل ما نستثمر في المكان، وكمان إحنا عايزين نعمل بيئة تساعد الشباب على التطور، مش مجرد وظيفة يروحها الصبح ويرجع منها بالليل، لكن مكان يتعلم فيه، ويكتسب خبرة، ويكبر خطوة بخطوة.
يمكن شاب يبدأ في وظيفة بسيطة، وبعد فترة يبقى مسؤول، أو مدير، أو يفتح مشروعه الخاص، وأنا مؤمن إن الفرصة الصغيرة، لما تتحط في المكان الصح ومع الشخص الصح، ممكن تتحول إلى نجاح كبير، وممكن يكون من بين الشباب اللي هيشتغلوا معانا حد يبقى عنده مشروع أكبر في المستقبل، ويرد هو كمان الجميل لبلده.
ماذا يمثل اسم «جيل زد» بالنسبة لك؟.. ولماذا اخترت هذا الاسم للمشروع؟
جيل زد هو الجيل اللي بيتولد في عالم مختلف؛ عالم التكنولوجيا والسرعة والمعرفة المفتوحة، لكن رغم كل التغيير ده، الشباب دول محتاجين شخص يؤمن بقدراتهم، وإحنا عايزين نربي شاب واثق من نفسه وفاهم بلده، متصل بجذوره، وفي نفس الوقت قادر يتعامل مع المستقبل.
مش عايزين الشباب تقع في اختيار بين إنه يكون متعلم وبين إنه يكون ابن بيئته، بالعكس عايزينه يعتز بأرضه وأهله ويستخدم العلم والتكنولوجيا علشان يطور حياته ومجتمعه، رؤية بتقول إننا لازم نستعد من دلوقتي للجيل اللي هيقود البلد بعد كده.
من وجهة نظرك.. ما هو الاستثمار الحقيقي؟ وهل يقتصر فقط على تحقيق العائد الاقتصادي؟
الاستثمار الحقيقي مش إنك تحط فلوسك في مشروع وتستنى العائد لنفسك فقط، الاستثمار الحقيقي إن فلوسك تتحول إلى قيمة، والقيمة دي يستفيد منها الناس حواليك، ولما أعمل مشروع ويوفر خدمة محترمة، ويخلق فرص عمل، ويدرب شباب، ويساعد أسر، ويضيف حاجة للمنطقة، يبقى أنا مش بس بحقق عائد اقتصادي، أنا كمان بساهم في تنمية المجتمع.
الربح مهم، لأن من غير استدامة المشروع مش هيكمل ولكن الربح وحده مش كفاية، ولازم يبقى عندك هدف أكبر، ولازم تسأل نفسك: المشروع ده هيسيب إيه وراه؟ كام شاب هيتعلم؟ كام أسرة هتستفيد؟ وإيه الأثر اللي هيفضل موجود بعد سنوات؟
المبادرة جزء من المسؤولية تجاه المجتمع، لكن أنا أحب أقول عليها مسؤولية وطنية وإنسانية قبل ما يكون مجرد مسؤولية اجتماعية، وأنا مش بعمل المشروع علشان أقول إن عندي مبادرة وخلاص، وأنا بعمله لأن دي قناعة عندي: إن كل واحد أخد فرصة، عليه إنه يسهّل الفرصة لغيره.
وكل واحد ربنا كرمه لازم يحاول يكون سبب في خير لناس تانية، وإحنا كلنا عايشين في دائرة واحدة البلد بتدينا وإحنا بنديها المجتمع يساند الفرد والفرد يساهم في بناء المجتمع، ولو كل واحد عاش لنفسه فقط، المجتمع مش هيتقدم، ولكن لو كل واحد حاول يمد إيده للي بعده، البلد كلها هتتحرك لقدام.
كيف تنظر إلى شباب أبو غالب؟ وما الذي تنتظره منهم خلال الفترة المقبلة؟
شباب أبو غالب عندهم الجدية والالتزام والرغبة في التعلم، والفرصة وحدها مش كفاية لازم الإنسان يتمسك بها ويطور نفسه ويثبت إنه قد المسؤولية.
وأنا عايز أقول لكل شاب: ما تستناش إن حد ييجي يغير حياتك بالكامل، ابدأ من المكان اللي إنت فيه، وتعلم، واسأل، وجرب، ولو وقعت قوم تاني، وكل نجاح كبير بدأ بخطوة صغيرة وإحنا من جانبنا لازم ندي الشباب مساحة يثبتوا نفسهم فيها، لازم نسمعهم، وندربهم، ونقبل إنهم يخطئوا ويتعلموا، والشباب مش محتاج كلام كتير، الشباب محتاج فرصة حقيقية وثقة حقيقية.
وماذا تقول لأهالي وشباب أبو غالب عن طبيعة المشروع ودورهم فيه؟
أحب أقول لأهالي وشباب أبو غالب إن المشروع ده معمول علشانهم ومعاهم، يعني «لأهله وبأهله» وده شعاره وإيماني، وإحنا جايين نكون جزء من المكان، مش جسم غريب عنه، وونجاح المشروع مش هيكون بنجاح الإدارة أو المستثمر فقط؛ نجاحه الحقيقي هيكون لما الأهالي يحسوا إن أولادهم استفادوا، وإن شبابهم لقى فرصة، وإن المنطقة بقت أحسن.
إحنا محتاجين تعاون الأهالي وثقتهم وملاحظاتهم، وأي مشروع ناجح لازم يسمع الناس اللي بيخدمهم، ويعرف احتياجاتهم الحقيقية.
ما طبيعة حاضنات جيل زد؟ وما الهدف الأساسي من إنشائها؟
حاضنات جيل زد هي حاضنات لريادة الأعمال، وهدفها إنها تساعد الشباب أصحاب الأفكار والمشروعات الناشئة إنهم يحولوا الفكرة من مجرد حلم إلى مشروع حقيقي قابل للتنفيذ والنمو، وإحنا مش عايزين الشاب يفضل عنده فكرة حلوة ومش عارف يبدأ منين، وعايزين نساعده يفهم السوق، ويعمل دراسة جدوى، ويعرف إزاي يخطط، وإزاي يدير فلوسه، وإزاي يسوق لمنتجه أو خدمته، وإزاي يبني مشروع يقدر يكمل ويكبر.
كيف ستساعد الحاضنة الشباب أصحاب الأفكار والمشروعات في المراحل الأولى؟
الحاضنة هتكون مساحة للشاب يتعلم فيها، ويقابل غيره من أصحاب الأفكار، ويستفيد من خبرات المتخصصين، ويلاقي توجيه ومساندة في المراحل الأولى، ولأن أصعب مرحلة في أي مشروع هي مرحلة البداية، والشاب ساعات بيكون محتاج حد يسمعه، ويوجهه، ويقول له إيه الخطوة اللي بعد كده.
هل الهدف أن يتحول الشباب من باحثين عن وظائف إلى صُناع للوظائف؟
إحنا عايزين نخلق جيل مش بس بيدور على وظيفة، لكن جيل قادر يصنع وظيفة لنفسه ولغيره، وده هو جوهر ريادة الأعمال: إنك تشوف مشكلة في مجتمعك وتحاول تقدم لها حل، وتحول الحل ده إلى مشروع له قيمة وأثر.
باعتبارك شابًا قريبًا من نفس التحديات التي يعيشها الشباب اليوم.. كيف انعكست تجربتك الشخصية على فكرة المشروع؟
أنا شاب، ولسه قريب من نفس التحديات اللي بيعيشها شباب كتير، وأنا عارف معنى إن الواحد يكون عنده طموح، لكن محتاج فرصة، وعارف معنى إنك تكون عندك فكرة أو قدرة، لكن مش لاقي المساحة اللي تثبت فيها نفسك.
وأنا أُتيحت لي الفرصة إني أكون بين صفوف المستثمرين الشباب، وأثبت نفسي كرجل أعمال، وده خلاني أؤمن أكتر إن الشباب المصري لما بياخد فرصة حقيقية، بيقدر يعمل حاجات كبيرة جدًا.
وكيف أثرت تجربة التمكين السياسي في رؤيتك لمفهوم تمكين الشباب؟
وكمان أُتيحت لي فرصة التمكين السياسي، من خلال وجودي في مجلس الشيوخ عن حزب مستقبل وطن، وسط تجربة مهمة من تجارب تمكين الشباب اللي بيشاركوا وبيقودوا وبيحطوا أفكارهم في خدمة بلدهم، التجربة دي علمتني إن التمكين مش مجرد إنك تدي الشاب لقب أو منصب.
والتمكين الحقيقي إنك تديله مساحة، وتسمع صوته، وتثق فيه، وتدربه، وتديله الأدوات اللي تخليه ينجح ويتحمل المسؤولية.
هل ترى أن حصولك على فرص في الاستثمار والعمل العام وضع على عاتقك مسؤولية تجاه شباب آخرين؟
لما الواحد يشوف إن بلده فتحت له أبواب في الاستثمار والعمل العام، بيحس إن عليه مسؤولية إنه يفتح أبواب لغيره، وأنا مش عايز أكون المستفيد الوحيد من الفرصة اللي أتيحت لي، بل عايز أنقل الخبرة دي لشباب تاني، وأساعدهم إنهم يبدأوا طريقهم.
كيف تفهم فكرة رد الجميل للبلد؟ وهل ترى أن رد الجميل يكون بالكلام أم بالفعل؟
أنا شايف إن رد الجميل مش بالكلام، لكن بالفعل، والبلد أتاحت لي فرصة إني أكون مستثمر، وأشارك في العمل العام، وأكون بين شباب بيقودوا وبيشاركوا في بناء المستقبل، فطبيعي جدًا إن دوري ما يقفش عند النجاح الشخصي.
وأنا عايز أساعد شباب تاني إنه يشوف نفسه في المكان اللي أنا وصلت له، مش شرط يوصل بنفس الطريقة، لكن يوصل بطريقته هو.
واحد يبقى صاحب مشروع، وواحد يبقى مستثمر، وواحد يبقى مدرب، وواحد يشارك في العمل العام، المهم إن كل واحد يلاقي فرصته ويعرف قيمة قدرته.
أنا اتعلمت إن الفرصة لما تتاخد لنفسك بس بتفضل محدودة، لكن لما تنقلها لغيرك بتكبر، وعلشان كده حاضنات جيل زد مش مجرد استثمار اقتصادي وتنمية مجتمعية وتعليمية، لكنها كمان استثمار في شباب المنطقة، وفي مستقبل المجتمع المحلي.
ما الرسالة التي تحب أن توجهها إلى الشباب؟
ما تستناش إن كل الظروف تبقى مثالية، ابدأ بالإمكانيات الموجودة عندك، واتعلم، واسأل، واطلب المساعدة، وما تخافش من الفشل، وأنا واحد من جيل شاف إن الفرصة ممكن تغير حياة الإنسان، وعلشان كده بقول لكل شاب: إنت مش أقل من أي حد، لكن محتاج تصدق في نفسك وتشتغل على نفسك، والحاضنة موجودة علشان تساعدك تحول ثقتك دي إلى خطوات عملية.
النجاح مش إنك تبدأ كبير، النجاح إنك تبدأ صح، وتتعلم من كل تجربة، وتفضل مكمل، وكل مشروع كبير كان في يوم من الأيام مجرد فكرة في دماغ شاب.
ما رسالتك الأوسع بشأن مستقبل مصر والاستثمار والتنمية؟
رسالتي إن مصر فيها خير كبير، وفيها أرض، وفيها شباب، وفيها ناس قادرة تشتغل وتبني، لكن لازم نؤمن ببعض، ولازم نربط الاستثمار بالتنمية، والنجاح بالمسؤولية.
كيف تلخص رؤيتك للأرض والشباب والتنمية وما الذي تتمنى أن يحققه مشروع حضانات جيل زد؟
أنا فلاح ابن فلاح، وفخور بأصلي وبالأرض اللي اتربيت عليها، والأرض علمتني إن مفيش محصول بيطلع من غير تعب، ومفيش شجرة بتكبر من غير رعاية، ومفيش بلد بتتقدم من غير ناس تؤمن بيها وتشتغل علشانها.
وأنا آمنت برؤية الدولة في إن الظهير الصحراوي والزراعة والتنمية العمرانية فرص جديدة لمصر ولشبابها، وشوفت إن أبناء المحافظات المختلفة، من الدلتا للصعيد والوادي الجديد وسيناء، يقدروا يكونوا شركاء في الاستثمار والبناء لما تتوفر لهم الفرصة، والنهارده دوري إني أرد جزء من الجميل زي ما بلدي فتحت لي باب، أحاول أفتح باب لشباب تاني، وزي ما الأرض أعطتني أحاول أزرع في الناس أمل وفرصة ومستقبل.
إحنا خلقنا في الأرض علشان نعمرها، وعمارة الأرض مش بس بالمباني والمشروعات، لكن كمان بالإنسان، ولما تربي طفل صح، وتدي شاب فرصة، وتساعد أسرة، إنت كده بتبني بلد، ومشروع حاضنات جيل زد هو خطوة صغيرة في مكان مهم، لكن طموحنا كبير، وطموحنا إن أبو غالب وشبابها يكونوا جزء من مستقبل الجمهورية الجديدة، مش مجرد متفرجين عليه.
إحنا بنفتح باب للشاب، وبنخدم الأسرة، وبنشارك في تنمية المجتمع، ودي مش مجاملة لبلدنا؛ دي مسؤولية علينا، لأن اللي اتزرع فينا من خير، لازم نزرعه في غيرنا.
