شنَّ إبراهيم سعيد، لاعب منتخب مصر السابق، هجومًا ناريًا على أحمد حسن، قائد المنتخب، وذلك في تصريحات عبر برنامج «+90» المُذاع عبر قناة النهار.
وقال سعيد: «كنت حابب أرد على أحمد حسن، وهو في برنامج كان مستضيف كابتن حسن شحاته المدير الفني التاريخي لمنتخب مصر، أكثر مدير فني حصل على بطولات؛ ثلاث بطولات 2006 و2008 و2010».
وأضاف: «وأنا مبسوط بصراحة إن أنا شفته يعني كابتن حسن قيمة كبيرة واسم كبير وأخ كبير لينا، على فكرة يعني أخ وأب وصديق، طولة العمر ليك ودائمًا منور الشاشة، بتمنى له الخير».
وتابع قائلًا: «دائمًا بياخدوا الموضوع في حته كده ما اعرفش هتفضل كده الموضوع بينا .. يعني خلاص لما الموضوع صفي ما اعرفش ليه خدته على قلبك يعني».
وأكمل: «أنا دايمًا في خلاف بيني وبين أحمد حسن ما اعرفش ليه؟ هو اللي دايمًا عامل خلاف؛ كل ده بسبب إن أنا ما بقولش ليه يا كابتن، طيب، أولًا أنت ما قلتش كابتن إبراهيم سعيد فطبيعي أنا مش هقول لك يا كابتن، ما هو هقول كابتن هتقول كابتن».
واستكمل سعيد حديثه قائلًا: «حتى أنت في الفيديو بتقول الكابتن حسن شحاته، أنا فجأة ما لقيتش إبراهيم سعيد في الملعب إيه الجو ده؟! الجو ده بيعملوه الأطفال الصغيره، يعني أنت إيه في الملعب؟! وفجاة ما لقيتنيش!! مش فاهم اختفيت لبست طاقية الإخفاء».
وأردف: «يعني ما أنا معاك في الملعب ولعبت البطولة كلها، يعني إيه أنت عايز توصل لايه يعني؟ ولا أنت ما تعرفش الموضوع ده السر ما بيني وما بين كابتن حسن شحاته، أنت مالكش دعوه بيه.. أنت مالك يعني، أنت آية نزلت من السماء».
واستردف: «شويه عشان واللهِ اللي بيبقى على الارض بتلاقي طبيعي، يعني خلي الأمور طبيعية خلي الأمور سلسة خلي الموضوع لذيذ، أحنا كنا مع بعض أنا وأنت، كنت كابتن وكبير واسم كبير بس أنا برضو مش صغير معاك، يعني دخلت في حتة تقدير، يعني كابتن حسن شحاته احترم السر اللي ما بيني وبينه».
واختتم سعيد حديثه قائلًا: «أنت أخذت كل الفرص الإعلامية والتدريبية، حتى التدريب ما نفعتش فيه مدير كرة لمنتخب مصر، ما مشيتش بيراميدز رغم إن أنت موجود في منظومة تنجح أي حد، لكن ما نجحتش أنت ليه؟ عايز تعمل عداوة من البداية إعلاميًا؟!».
