ناشدت الدكتورة رشا عادل، أستاذ علم النفس التربوي المساعد بكلية بنات عين شمس وزير التربية والتعليم محمد عبد اللطيف إنقاذ مستقبل طلاب الثانوية العامة وإزالة الغموض والخوف من نظام البكالوريا، في مقطع ريل نشرته عبر صفحتها الرسمية على فيسبوك، وأطلقت عليه “صرخة رقم 2 لمعالي وزير التربية والتعليم”.
أسئلة شائكة لوزير التعليم عن نظام البكالوريا
وقالت عادل: “معالي الوزير، أنا باناشد فيك حكمتك. عارفين إن الطلبة كلهم ولادك، وإن حضرتك أد المسئولية إن شاء الله، وإنك خايف عليهم أكيد؛ لأنهم أمانة“.
ووجهت الدكتورة رشا إلى وزير التعليم مجموعة أسئلة شائكة عن نظام البكالوريا بقولها: “إزاي الدراسة قرَّبت تبتدي ع الأبواب خلاص ولسه فيه جدل داير بين نظام البكالوريا الجديد ونظام الثانوية العامة بنظامها الجديد، إزاي؟”.
كيف تقول المدارس إن تسجيل الطلاب للبكالوريا فقط؟
“إزاي الوزارة بتمارس ضغوط على أولياء الأمور والطلاب.. إنّ ولي الأمر يروح يقدِّم في المدرسة يتقال له أنا مش هاقدر أسجِّل؛ لأن اللي عندي نظام البكالوريا بس”.
“ليه حضرتك ما أعلنتش عن المدارس اللي هتطبق النظام الجديد فقط؟ ليه ولي الأمر يتفاجئ؟ أنا كأم أو أب وعندي بنت والمدرسة اللي جنب البيت ما فيهاش نظام قديم، أودِّيها فين؟”.
وأضحت سلبيات اتخاذ قرار البكالوريا دون التجهيز له قائلة: “حضرتك كده بتعمل فروق ما بين الطلبة وبعض، وكمان في النوع. أنا خايف على بنتي.. خلاص يبقى هاوافق على نظام البكالوريا حتى لو مش مقتنع”.
البكالوريا نظام رائع.. لماذا لم توضح ذلك للناس؟
وأشادت بنظام البكالوريا في رسالتها الموجهة إلى وزير التعليم قائلة: “على فكرة نظام البكالوريا نظام حلو جدًّا.. بيقسِّم المواد ويعتبر شهادة نهائية، وبيكون فيه فرصة للتحسين.. نظام رائع، بس حضرتك ما وضَّحتش ده للرأي العام.. حضرتك ما قلتليش.. حضرتك بتُجبِر الناس في الفترة دي”.
https://www.facebook.com/reel/789587006771176
وأكدت أن “التغيير جميل، وكلنا عارفين إن المناهج وعارفين إن النظام محتاج تطوير عشان نواكب العصر، وكل الكلام الرائع ده، بس بالتدريج.. بطريقة مُقنَّنة.. بأني أفهم كل الناس”.
لماذا فشل وزير التعليم السابق؟
ولفتت إلى دور وزير التعليم السابق في هذا الملف بقولها:”يا افندم برغم إنه كان فيه إجراءات كتيرة.. معالي الوزير الدكتور طارق شوقي كان بيحاول ينفذها، رغم إنها كانت مهمة، وكانت هتعمل حاجات كتيرة جدًّا. ليه فشل؟ علشان الناس ما استوعبتهاش.. علشان فكرة الانفراد بالرأي.. عشان فكرة إنّ ما كناش جاهزين”.
هل هناك بنية تحتية لتطبيق البكالوريا؟
ووجَّهت لوزير التعليم السؤال الأهم: “هل حضرتك البنية التحتية اللي في المدارس جاهزة لتطبيق البكالوريا؟”.
وأوضحت أن “المطلوب من الوزارة إنها توضح فلسفة وجود نظامين في المدارس وليه يحصل ده، وتطمِّن الناس”.
لماذا يخاف الناس من البكالوريا؟
وأضافت: “أنا دلوقتي كولي أمر قاعد وبافكر يا ترى الولاد اللي اتعملوا بالنظم التقليدي هيخشُّوا جامعات حكومية؟ يعني الفلوس أقل شوية؟ طاب وأنا ابني اللي اتعلم بالبكالوريا ممكن يدخل أكتر ويخشّ جامعات أغلى؟”.
ما المشكلة في أن تكون هناك شفافية؟
وتابعت: “يا افندم الناس خايفة وقلقانة. ساعد الناس.. عرَّفهم. إيه المشكلة؟ حق الناس تخاف، وحقهم إنّ حضرتك لازم تكون فيه شفافية أكتر من كده”.
وشددت الدكتورة رشا عادل، أستاذ علم النفس التربوي المساعد بكلية بنات عين شمس، على أن “التزام الحكومة ناحية الشعب مهم إنّ احنا نفهم القرارات اللي بتتنفذ ما بين ليلة وضحاها دي صعبة قوي.”
وأكدت أنها ليست ضد التطوير قائلة: “إحنا مش بنقاوم التغيير ولا التطوير، بالعكس، بس بنحب نفهم؛ لأن كل حاجة تمشي بالتدريج.. كل حاجة محتاجة وقت”.
واختتمت بقولها: “على فكرة كل حاجة ممكن تبقى جميلة جدًّا، بس الناس تفهمها. الناس لما بتقاوم حاجة بتقول خلِّيني في القديم عشان خايفة. ما تخوِّفهمش.. وضح لهم”.
