وجّه الإعلامي سيف زاهر رسالة قوية للاعبين المحترفين في الدوري المصري، متحدثًا عن بعض التصرفات السلبية التي بدأت تظهر مؤخرًا في تعامل بعض اللاعبين مع أنديتهم.
وقال زاهر عبر قناة أون سبورت: «رسالة لكل من يهمه الأمر للعيبة المحترفة، اللعيب دلوقتي بيخش النادي يتصور، مبتكلمش على الأندية الكبيرة، كل الأندية العادية يعني، يتصور وبعد كده يقول له أنا كان حلم حياتي ألعب هنا، ويعمل عقد أربع سنين وياخد فلوس كويسة، ويبقى المسؤولين والمدير الفني انتيمه ورئيس النادي والده، وبنسمع أحلى تصريحات».
وأضاف منتقدًا ما وصفه بـ”الاحتراف المزيف”: «يجي له عقد من نادي كبير ويتألق بعد فترة، حقك، بس استنى بقى أما النادي بتاعك ده يستفيد. لأ، أتمارض وأمتنع عن التدريب ويقولك مش لاعب كورة تاني.. هو ده الاحتراف يعني؟».
وتابع بنبرة حادة: «هو الاحتراف حضرتك إنك بتلعب في نادي، أما يجيلك نادي كبير.. يا أروح يا مش لاعب؟ الكلام ده بينفع بس في دورة رمضانية».
وأشار إلى أن بعض الأندية باتت تعاني من هذه السلوكيات: «أنا الحقيقة جالي تلات أربع اتصالات امبارح وأول امبارح من رؤساء أندية في الدوري الممتاز، يقولك مش عارفين نسيطر على اللعيبة».
واختتم رسالته بصرامة: «مش عارف تسيطر على إيه؟ مش هتسيطر عليه، بطلوا كورة، اقعدوا.. ما في عقد يلتزم بالعقد، مفيش مشكلة. مفيش حاجة في الكورة اسمها مش لاعب ومش جاي.. ده مش موجود في أي حتة في العالم. خلي النادي يبيعك برقم كويس، وخد حقك وربنا يكرمك وتكسر الدنيا… دي بس رسالة لكل لاعب فاكر إن دي السكة اللي أروح بيها».
