وجه الفنان طه دسوقي الشكر لطاقم عمل مسلسل حالة خاصة، وذلك بعد نجاح المسلسل، عبر حسابه الشخصي على موقع التواصل الإجتماعي «فيسبوك».
طه دسوقي يشكر طاقم عمل حالة خاصة
وكتب دسوقي في منشور له: «شكرًا كلمة قليلة جدًا على كم الحب والمباركات اللي جايالي منكم من أول عرض المسلسل، وأسف لو ملحقتش ارد على ناس كتير بس حابب أشكر أولًا كل اللي سهل عليا إني أعمل شغلي وأسف لو هيبقى بوست طويل شوية، شكرًا لكوتش التمثيل نديم اللي اشتغلنا مع بعض على الدور، شكرًا للجمعية المصرية للتوحد ودكتورة داليا سليمان اللي ساعدوني أعرف أكتر وجاوبوني على أسئلة كتير جدًا عن التوحد وقابلوني بناس كتير على طيف التوحد من مختلف المراحل، شكرا عبدالله أشرف اللي قابلته في الجمعية وكان معايا في مرحلة التحضير وفادني جدًا إني أتعرف عليه أكتر».
وتابع: «شكرا للصديقة الممثلة ملك ياسر اللي ساعدتني بمعلومات كتير عن التوحد وخاصة المرحلة اللي فيها نديم، شكرًا لصديقتي الدحيحة مراتي نادين اللي دايما في ضهري وتحمست معايا وقعدت دورتلي على حاجات أشوفها وأقراها عشان أعرف معلومات اكتر، شكرًا لسالي فايز ولكل فريق ginger».
طه دسوقي يشكر أبطال وصناع حالة خاصة
ووجه دسوقي الشكر للممثل أحمد أمين قائلًا: «شكرًا أستاذي وأخويا الكبير أحمد أمين اللي مترددش لحظة إنه يكون جنبي في أول حلقة من المسلسل، واللي حقيقي من أكتر المشاهد اللي استمتعت بيها».
وأضاف: «ثانيًا شكرًا لكل فريق العمل بداية من أستاذ طارق الجنايني اللي اختارني وحملني مسؤولية إني أكون ضمن المسلسل ده.. مرورًا بالمؤلف مهاب طارق إللي عمل حدوتة مهمة وسلط الضوء على فئة ناس كتير أوي متعرفش عنها حاجة وقرر إنه يضفر أحداثها بأغاني فرقة المصريين، والمخرج عبدالعزيز النجار اللي أنا متأكد اني تعبته معايا، وكل فريق العمل اللي ورا الكاميرا من مهندسة الديكور سالي الشامي والستايلست فريدة فؤاد ومهندس الصوت عمرو عصام، وصولًا للمونتير إللي اشتغل عالمشروع بحماس ميقلش عن أي حد فينا كريم سعد، شكرًا لكل كرو التصوير على رأسهم أستاذ محمد عبد الرؤوف ، شكرًا الأستاذة الكبيرة -مقاما مش سنا- غادة عادل على حبها وإحترامها لشغلها ودعمها ليا في مسلسل زي ده، شكرًا ومبروك لزمايلي على مجهودهم هاجر السراج – وئام مجدي – احمد أزعر – حسن ابو الروس – على السبع – لينا إيهاب».
وشكر أيضًا الموسيقار هاني شنودة: «شكرًا للعبقري هاني شنودة اللي ربط التجربة دي بالموسيقى بتاعته وبأغانيه وشرفنا كلنا بإنه يحط عليها اسمه».
واختتم دسوقي كلامه: «أخيرًا شكرًا تاني لكل حد كتب عن المسلسل أو بعتلي أو باركلي وأتمنى باقي المسلسل يعجبكوا من قلبي شكرا».
