في هجوم لاذع عبر قناة “النهار”، عبّر أحمد بلال، نجم الأهلي السابق، عن استيائه الشديد من أداء الأهلي في مباراته الأخيرة أمام إنتر ميامي، مؤكدًا أن الفريق لم يُقدّم المستوى المتوقع منه، خاصة في بطولة بحجم كأس العالم للأندية.
وقال بلال:
“أنا مش عاجباني المباراة إمبارح خالص ولا أداء الأهلي زي ما الناس بتقول. هو الأهلي أول مرة يشارك في كأس عالم للأندية؟ لأ طبعًا. الأهلي لعب مع فرق أقوى من إنتر ميامي وقدم مستويات ممتازة.”
وتابع منتقدًا الفريق الأمريكي:
“مع كامل احترامي لإنتر ميامي، لو شيلنا ميسي ونزلنا إحنا الكباتن اللي في الاستوديو نلعب، النتيجة كانت هتطلع صفر – صفر عادي! الفريق مفيهوش غير ميسي بس، هو اللي بينقل وبيلعب وبيعمل كل حاجة.”
وأضاف بلال ساخرًا:
“الفرقة دي هتتغلب خمسة أو ستة من أي فريق تاني، واللي يقول إن الأهلي لعب شوط كويس، يبقى هو فاهم الكورة غلط. الشوط الكويس يعني تكسب، مش تعمل فرصة واتنين وخلاص.”
واختتم تصريحاته بنبرة غاضبة:
“إنت بتلعب قدام فرقة إمكانياتها ضعيفة جدًا، لاعيبة كبار في السن، مفيش أي تهديد حقيقي، كل اللي عندهم إنهم يبادلوا الكورة بين بعض. يعني لو الأهلي كسب شوط واتغلب في التاني، ده مش اسمه أداء جيد!”
