انتقد المحامي أحمد مهران مشاهد الرقص والزغاريد أمام لجان التصويت في انتخابات مجلس الشيوخ، واصفًا المشهد بـ«المولد»، ومتسائلًا عن مدى وعي المواطنين بالدور الحقيقي للمجلس.
وكتب عبر صفحته على «فيسبوك»: «أنا كأحمد مهران نفسي أفهم، ليه الرقص والزغاريد قدّام اللجان؟ هو لما يقولوا عرس ديمقراطي تبقوا فاكرينه فرح بنت العمدة، بنلاقي الرجالة متحزمين، والستات تزغرد، وطبل ورقص كأننا في مولد».
وتساءل مهران في منشوره إذا كان المواطنون يدركون طبيعة مجلس الشيوخ، ودوره في العملية التشريعية، متهمًا بعض المرشحين بعدم التفاعل مع الناس بعد فوزهم، وعلّق قائلًا: «أنا رسالتي للراجل اللي بيرقص في الصورة ده هو انت فاهم مجلس الشيوخ ده دوره ايه في التشريع يا حج، ولا ايه هي آليات عمله في مراقبة الحكومة ولا أي حاجة من دي، طب إنتوا عارفين إن أغلب اللي بيترشحوا أصلاً مش بيشوفوك بعد ما ينجحوا؟»؟
وأشار إلى أن ثلث أعضاء المجلس يتم تعيينهم بقرار دون انتخابات، منتقدًا ما وصفه بـ«استغلال فقر الناس»، قائلًا: «طب تعرف إن فيه 100 عضو منهم معينين بقرار يعني من غير انتخابات ولا عرس ديمقراطي، ولا هو الموضوع كله عشان الورقة أم 200 جنيه، ولو عليك القيمة تبقى 500، والوجبة وعلبة العصير»؟
وعبر مهران عن ما يحدث قائلاً: «اللي بيحصل استغلال واضح لفقر الناس وحاجتهم، لدرجة إنهم بيشتروا حضورهم وصوتهم بوجبة وورقة بمتين جنية، والمصيبة إن اللي بيرقص النهارده قدّام اللجنه».
واختتم حديثه قائلاً: «اللي بيرقص النهارده قدّام اللجنة، بكرة هيشتكي من الغلاء وأن الكهرباء بتقطع، ومن التيك توك، ومن تدهور الأخلاق».
