أكد محمد الشناوي، حارس مرمى الأهلي، أن الفريق يدخل مواجهة الهلال السوداني في إياب ربع نهائي دوري أبطال إفريقيا بكل تركيز، وعينه على بطاقة التأهل إلى نصف النهائي.
وقال الشناوي، في المؤتمر الصحفي الذي يسبق المباراة: “عارفين كويس قد إيه المباراة دي صعبة، لكن حضّرنا لها بشكل قوي، سواء في الذهاب أو العودة. كسبنا على ملعبنا، ودلوقتي الشوط التاني في موريتانيا، قدام خصم قوي عنده عناصر مميزة”.
وأضاف: “إحنا دايمًا بنلعب علشان نكسب، وهدفنا واضح: نرجع من موريتانيا بالتأهل علشان نرّضي جماهيرنا”.
وتابع: “الهلال لعب بشكل كويس في الذهاب، لكن إحنا اللي فزنا، ودلوقتي جايين نكرر الفوز في الإياب”.
واختتم الشناوي تصريحاته، قائلًا: “الهلال متعود على ملعب المباراة لأنه بيلعب عليه دايمًا، لكن إحنا كمان عندنا خبرة، وأنا شخصيًا لعبت هنا من 3 شهور، وكذا لاعب من الفريق كمان عنده نفس التجربة، فمش هنخلي الأرضية تعطلنا”.
ويستعد الأهلي، تحت قيادة السويسري مارسيل كولر، لمواجهة الهلال السوداني في لقاء الحسم على أرض موريتانيا، وسط طموحات جماهيرية كبيرة ببلوغ المربع الذهبي في دوري الأبطال.
