في تصريحات نارية عبر قناة الأهلي، كشف الإعلامي أحمد شوبير كواليس حزينة يعيشها لاعبو الفريق الأول لكرة القدم، عقب الخسارة الأخيرة أمام بالميراس في بطولة كأس العالم للأندية 2025.
وقال شوبير: “أنا قابلت لاعيبة كتير، مش قادر أقولكم كم الحزن اللي هما فيه، الناس فاكرة إنهم مش فارق معاهم، وده مش حقيقي خالص”.
وأضاف: “اللاعيبة يا جماعة نزلوا اشتروا هدوم وكوتشيات ورجعوا على طول الفندق، ومفيش خروج ولا فسح زي ما الناس بتقول، هما بينزلوا من الأوض بس علشان الأكل، الاجتماعات أو التمرين”.
وأشار إلى أنه استغرب من الحملة الموجهة ضد اللاعبين بسبب خروجهم لبعض الوقت قائلًا: “بالعكس، الجهاز الفني شايف إن ده ضروري”.
كما نقل شوبير عن المدرب ريكاردو ريبيرو قوله: “اللاعبين مضغوطين جدًا من أول ما وصلوا، وبيمروا بشد عصبي كبير، وكان لازم يخرجوا شوية من الحالة دي علشان يرجعوا يركزوا”.
وأكد شوبير أن الفريق خاض مرانًا قويًا بالأمس استعدادًا للمواجهة المقبلة أمام بورتو، مضيفًا: “الفرقة ركزت جدًا، والكل عايز يصحح الصورة ويفرح الجماهير”.
وتأتي هذه التصريحات في محاولة لتهدئة جماهير الأهلي الغاضبة، بعد الأداء الباهت للفريق حتى الآن في البطولة.
