علق محمد فارس، المذيع بقناة النادي الأهلي، على خبر سداد غرامات نادي الزمالك، في منشور عبر صفحته الشخصية على شبكة التواصل الاجتماعي «فيسبوك».
وكتب فارس: «تعمدت بالأمس مكتبش عن خبر سداد غرامات الزمالك؛ لأن الموضوع أكبر من أنه يتكتب عنه جملة تتوه في وسط الزحمة؛ لأننا أمام مصيبة لازم تتشاف بشكلها الحقيقي».
وأضاف: «الزمالكاوية فضلوا يسألوا هو الأهلي جاب الدولارات اللي بيدفعها لموديست أو ضم بيها وسام أبو علي منين, مع أن الأهلي عنده مداخيل بالدولار من بيع محمد شريف وحمدي فتحي ومن التتويج بدوري أبطال أفريقيا وبرونزية كأس العالم للأندية تتخطى 10 مليون دولار».
وتابع «فارس»: «ده غير أن النادي بشكل تراكمي شارك في 4 مونديال أندية على التوالي، ومحقق 3 دوري أبطال آخر 4 سنين، يعني محقق عوائد خيالية بالدولار هو النادي الوحيد في القارة اللي نجح يدخلها لدولته، وفكرة مصروفاته بالدولار مقابل إيراداته هي فكرة بديهية لأي واحد عنده عقل».
وأكمل مذيع قناة النادي الأهلي: «إنما تعالى أنا اسألك كزمالكاوي زي ما أنت سألت، هو أنت يا زمالك جبت الدولارات اللي دفعت بيها الغرامات لرفع إيقاف القيد منين».
وأوضح أنه وفقا للتصريحات الرسمية فتم سداد أكتر من 2 مليون دولار، ده حصل إزاي و أنت لا يوجد إيراد دولاري يغطي الغرامات وإلا كنت دفعتها من بدري.
وأردف: «يعني في وقت بنعاني فيه من أزمة في الدولار نادي بيخرج 2 مليون دولار في الخارج كغرامات وهو أصلآ لايمتلك إيراد من الخارج بالدولار».
واستطرد «فارس»: «يعني كلنا بنتعاقب وبندفع ثمن الفشل الإداري لسنوات من نادي الزمالك، لا ودي مش فلوس صفقة ولا حاجة هتعمل إضافة ممكن الزمالك يكسب منها بعد كده لا لا دي تجارة في الخسارة بالدولار نتيجة عدم الالتزام بالعقود».
وواصل: «فلوس هيئة ستاد يقال إنهم النادي الوحيد اللي مدفعهاش، وفلوس ضرائب بالملايين لم تسدد، ومديونيات اتحاد كرة تقعد بالسنين وفلوس غرامة بتتحول للخارج بالدولار والنادي معندهوش إيراد بالدولار مقابلها».
واختتم مقدم البرامج بقناة الأهلي: «وبعد كل ده شايفين إنهم نادي وجمهور عليه مؤامرة ومظلومين لا وبيحاسبونا كمان إحنا اللي جبنا الدولارات منين، هو في كده».
