تفحص الأجهزة الأمنية منشورا متداولا عبر فيسبوك تحكي فيه أم عن محاولات خطف طفلها داخل ميكروباص في المؤسسة بمنطقة شبرا الخيمة محافظة القليوبية، وذلك حسب زعمها.
وأثار منشور كتبته سيدة تدعى هبة الله على صفحتها بالفيسبوك خوفا شديدا وجدلا بين رواد مواقع التواصل الاجتماعي والسوشيال ميديا، وفيه تصف تفاصيل تعرضها لمحاولات جريئة وملحة من سيدة لخطف رضيعها داخل الميكروباص مدعما بصور للميكروباص والسيدة التي حاولت اختطاف طفلها، ووصفت ما حدث لها أنه أسوأ موقف مرت به في حياتها.
قصة خطف طفل شبرا الخيمة
وفقا لمنشور هبة الله فإن محاولات خطف طفلها الرضيع بدأت قبل ركوبها ميكروباص من القناطر الخيرية للذهاب إلى المؤسسة بـ شبرا الخيمة محافظة القليوبية، وجاءت تسلسل الأحداث التالي وفقا لادعائها..
طلبت تاخد ابني مني
وكتبت هبة: “أنا النهارده اتعرضت لأسوأ موقف عدى عليّا في حياتي، كنت نازلة من عند ماما من طريق القناطر الخيرية، في عربية المؤسسة شبرا الخيمة الطريق الدائري، وركبت العربية بابني، وبعدها ست طلبت تاخد مني “تيّم” ابني، وأنا في الطبيعي أرفض المساعدة دي حتى لو معايا شنطة أو حاجة ما حدش ياخد ابني مني، بصراحة مش باطمئن”.
طلبت 5 مرات تقعد جنبي ورا وشدت الشنطة مني
وأوضحت أن السيدة “طلبت مني بإلحاح غريب أقعد جنبها وأرجع ورا، ومصممة أكتر من 5 مرات تقول لي تعالي هنا جنبي، وتشد مني الشنطة، وبتقول لي هاتي الولد، وأنا برضو أرفض”.
وأضافت “أنا كنت ماسكة 2 تليفون في إيدي قالت لي بتطفل غريب: شيلي الموبايلات في الشنطة، علشان لو وقعوا مش هتلاقيهم، ما رديتش على كلامها”.
أول ما اللي جنبي نزل قعدت مكانه بسرعة
وتابعت هبة “وف نص الطريق اللي جنبي نزل من العربية، قامت هي بسرعة غريبة قعدت جنبي، وفضلت تسألني ليه الولد بيعيط؟ وما رديتش عليها”.
طلعت ببرونة وطلبت تاخد الطفل ترضعه
وواصلت “سألت تاني قلت لها تعبان، هنا بقى أغرب رد فعل شفته.. طلعت ببرونة من شنطتها، وطلبت تاخده تشربه منها، طبعًا رفضت بشدة”.
طلعت اسبراي وقالت مسك من عند الرسول
وأكملت “بعد شوية طلعت من شنطتها عبوة اسبراي صغيرة، وقالت لي: المسك ده من عند الرسول. زقيت إيديها بشنطتي جامد، وقلت لها: أنا عندي حساسية ومش باشم مسك”.
طلعت إزازة مية 2 لتر وكومة مناديل
وكشفت أم طفل شبرا الخيمة أن السيدة”معاها إزازة مايه 2 لتر كبيرة جدا وبرضو أول مرة في حياتي أشوف حد ماسك مياه بالحجم ده، وماسكة كتلة مناديل فوقيها، طلبت مني أشرب، وبتقول لي: مخضوضة كده ليه؟ قلت لها: أنا مش مخضوضة ومش محتاجة مساعدتك ومن فضلك ما تتكلميش معايا”.
زعقت وعرَّفت الركاب وصورتها
وقالت “هنا عليت صوتي وشخص ورا سمعني وسأل فيه حاجة؟ أنا كررت كل اللي هي قالته.. وفي اللحظة دي كنت حاضنة ابني وبادعي من كل قلبي إنه يحفظه لأني ما ليش غيره، وفي الوقت ده طلعت تليفوني وصورتها”.
هربت من الميكروباص وكان معاها شاب وواحدة تانية
واختتم هبة الله بقولها: “لما حكيت للشخص اللي ورايا، هي في لحظة نزلت من العربية، والغربية كان معاها شاب وواحدة تانية قدامنا، مع كل كلامها معايا هي ما تكلمتش معاهم للحظة ولا باين إن كان معاها حد”.
الأجهزة الأمنية تفحص المنشور
وتفحص الأجهزة الأمنية بمديرية أمن القليوبية المنشور المتداول؛ لكشف ملابسات الواقعة وبيان مدى صدق السيدة، واتخاذ الإجراءات القانونية اللازمة.
