كشف خالد الجوادي، مترجم الأهلي السابق، كواليس ضبط مارسيل كولر المدير الفني للنادي الأهلي الأسبق، لغرفة ملابس اللاعبين، مشيرًا إلى رفض كولر التعاقد مع مصطفى شلبي لاعب الزمالك السابق.
كواليس تعنيف كولر للاعبي الأهلي
وقال خالد الجوادي من خلال تصريحات تلفزيونية: ” أن كولر في بداية توليه المهمة الفنية للنادي الأهلي، طلع أوضة اللبس لقاها ازايز على الأرض وهدوم على الأرض وقشر موز والدنيا متبهدله”.
وأضاف الجوادي: “راح مطلع التليفون ومصور كل حاجة، تاني يوم في المحاضرة عرضلهم الصور، قالهم انتوا بتلعبوا كورة بالظبط زي منظر الأوضة دي، كل حاجة عشوائية ومبعثرة ومفيش اي نظام”.
وتابع: “قالهم العمال دول ناس محترمين وبتتعب وبتشقى وبتاخد فلوس قليلة مقارنة باللي انت بتاخده، لازم تحترم البني آدم دا، وان اقل حاجة ترمي ازازة الماية في الباسكت، مش يقعد هو يلم كل حاجة وراك ، واللاعب اللي هيعمل كدة تاني مش هيشمها تاني”.
اقرأ أيضاً:بيتسو موسيماني: عودتي إلى الأهلي مرهونة بتغيير العقلية وتقبل الخسارة
وأشار: “الدنيا ممشيتش برضه كويس ، بس لما بدأت العقوبات من الراجل دا اللاعيبة قالت دا شكله مش بيهزر ، الدنيا مشيت بعد كدة مظبوطة، لدرجة انه مكنش بيحب لاعب يلبس مخالف عن التاني واللي يلبس شبشب واللي يلبس كوتشي، قالهم كله هيلبس لبس النادي وسبونسر النادي ، وكله هيلبس نفس الحذاء بتاع النادي ، احنا نادي واحد وملتزمين في كل تصرفاتنا جوة وبرا الملعب”.
تعاقد الأهلي مع مصطفى شلبي
وعن تعاقد النادي الأهلي مع مصطفى شلبي قال الجوادي: “الأهلي كان مخلص مع مصطفى شلبي، كولر لما شافه، قالهم لأ انا عندي لعيبة أفضل منه، عقليته في الملعب لا تصلح للنادي الاهلي وفنيًا مش أفضل حاجة، ومش عايز اشتري لاعب هو أقل من اللي عندي”.
