كشف الإعلامي أمير هشام عبر برنامج بلس 90 على قناة النهار أن نجم وسط بتروجيت حامد حمدان بات حديث جماهير نادي الزمالك خلال الساعات الأخيرة، مؤكدًا أن اللاعب “يميل بشكل كبير للانتقال إلى القلعة البيضاء”.
قال هشام: «حديث الساعة بالنسبة لجماهير نادي الزمالك هو نجم وسط بتروجيت، حامد حمدان، والحقيقة كمان جمهور نادي الزمالك يعني عاطفي إلى حد كبير، أول لما بيلاقي حد شاريه قوي برضه بيبقى حابه وعايزه يجي».
وأضاف: «حتى على المستوى الفني، هو اللاعب يستحق، وأعتقد دي شهادة ناس كتير جدًا من الفنيين، اللي هم أفضل مننا بكتير في قراءة أو تقييم أي لاعب».
وانتقد أمير هشام الطريقة التي أدار بها نادي بتروجيت ملف اللاعب إعلاميًا، خاصة بعد التعديلات المتكررة في البيان الرسمي الصادر عن النادي، قائلًا: «أنا عايز ألوم شوية على إدارة بتروجيت في الحقيقة… في حتة البيان نفسه، اللي هو إيه، إن تلات تعديلات في بيان للنادي، دي مش حلوة، لقطة مش حلوة، وإن دلت فتدل على عدم الاحترافية أو على أن في عدم شفافية، مفيش وضوح… أما بيان يتعدل ثلاث مرات، فدي حاجة غريبة».
رغم ذلك، أكد هشام احترامه لحق بتروجيت في التمسك باللاعب: «أنا مستغرب بصراحة من كم الهجوم على إدارة بتروجيت بخصوص القرار بتاعهم بعدم البيع، محدش يقدر يجبر أي نادي إن هو يسيب اللاعب بتاعه، مينفعش.. طالما مرتبط بعقد».
وأشار هشام إلى أن رغبة اللاعب واضحة تمامًا: «المعلومة عندنا إن حامد حمدان رغبته الأولى الانضمام لنادي الزمالك، أه اللاعب هيموت ويروح نادي الزمالك ودي حقيقة وبيضغط».
كما فجر مفاجأة في نهاية الحلقة، بإعلانه عن دخول نادي بيراميدز على خط المفاوضات: «قبل ساعة بالضبط من دلوقتي، حصل تواصل رسمي بين نادي بيراميدز ووكيل اللاعب، وعرضوا عرض كبير جدًا لخطف حامد حمدان».
وأوضح أن الزمالك لم يغلق الباب بعد، وهناك جلسة مرتقبة: «في بكرة جلسة فاصلة في مصير اللاعب مع بتروجيت، والجلسة دي هتكون ما بين جون إدوارد، المدير الرياضي في نادي الزمالك، ومسؤولي بتروجيت».
وختم قائلًا: «أنا بقول لك بنسبة تصل لـ 70% حامد حمدان زملكاوي وممكن تكون أكتر من كده، طبقًا للمعلومات الأخيرة في الساعات الأخيرة، يعني ممكن بكرة تتفاجئ إن اللاعب بقى زملكاوي».
