يهتم الكثير من محبي الفنان عمر مصطفى متولي بمتابعة أخباره وعن حقيقة وجود خلافات وراء اعتذاره عن المشاركة في الجزء الثاني من فيلم «شمس الزناتي» وحقيقة وجود خلافات بينه وبين طاقم العمل.
عمر مصطفى يخطط لإعادة شخصية سيد سبرتو
وكشف متولي خلال تصريحات له لبرنامج «الراديو بيضحك» مع فاطمة مصطفى والذي يبث عبر إذاعة 9090 قائلاً، بالتأكيد مفيش أي حقيقة للكلام ده، الفكرة كلها إنى من أن قبل دخولى مجال التمثيل وعندي حلم لإعادة شخصية سيد سبرتو اللى قدمها والدي في الفيلم.
وذكر الفنان عمر مصطفى، بالتأكيد مفيش منتج ولا أي شخص هيبقى لذيذ بالنسبة ليه إنى أعمل الشخصية وبعدها اعملها في مسلسل أو فيلم لوحده، وهو ما جعلني أعتذر، وبالمناسبة الممثل اللى هيعمل الشخصية مميز جداً، ولو أنا بفكر أختار مش هلاقى أحسن منه يقدم الدور.
عمر مصطفى يكشف عن أسباب عدم مشاركته في مسرح مصر
وتطرق مصطفى للحديث عن أسباب غيابه عن المشاركة في مسرحية «مسرح مصر»، وعن حقيقة وجود خلافات بينه وبين الفنان أشرف عبد الباقي.
وأردف قائلاً، هو فيه أطيب من أشرف عبد الباقي، هل تتخيلي أن حد يبقى شغال معاه 5 سنين ثم يختلف معاه أوي، ده أحنا كنا بنختلف معاه كل بروفة ونقعد نهزر ونضحك بعدها بـ 5 دقايق ومش فاكرين إحنا كنا بنتكلم في ايه، متابعاً العلاقة بين الفرقة دي بالذات بيني وبين أشرف كانت عاملة زي علاقة أسرة، لأن النجاح بتاع مسرح مصر ده مايجيش جوه مجموعة بتتخانق كتير مستحيل، أنا كنت وقتها بحضر فيلم الجبابرة وبالمناسبة ده نزل دعايته على إنستجرام لسه موجود عندي، بس احنا هنضطر نعيده لأن رجاء الجداوي ولبنى محمود ومها أبو عوف التلاتة توفوا إلى رحمة الله، والفيلم ده كمان في حته لوحده، وقصته أنا وسواق أتوبيس مع 10 ستات فوق السبعين وهيتعاد من الأول.
وذكر مصطفى: “الفيلم كنا بنحضره وقت ما كان بيبدأ الموسم السادس بتاع مسرح مصر، ومسرح مصر كان بياخد من وقتنا 16 ساعة في اليوم لمدة 4، 5 أيام في الأسبوع، وكده انت حياتك كلها في مسرح مصر،اخرك تصور جمبه حاجة هادية أو بسيطة ده لو لحقت، وإحنا عشان نصور أوشن 14 مع مسرح مصر كنا مابنامش وكان الموضوع مرهق جدًا”.
وتابع: “كان عندي مشكلة كمان وكانت عندنا كلنا وده طبيعي، أن احنا كنا بقالنا 5 سنين كل سنة بنعمل 25 مسرحية، والفنانين العظماء اللي قبلنا في المسرح كان بيبقى معاهم رواية وتقعد معاه سنين وهو حافظها فمش واخدة من حياته هذا الضغط، إنما أحنا كنا بنعمل رواية جديدة كل 3 أيام، وتحبط أيام أن الرواية مابتضحكش وبعدها بكام يوم تشتغل على مسرحية جديدة خالص”.
وأكمل، لما كنت شغال معاهم في مسرح مصر مكنتش أخش معاهم كل مسرحية، انت في الموسم هتشوفي 20 مسرحية أنا داخل في 10 منهم في مواسم 8 وفي مواسم 16، وأوس أوس مثلا كان سواق توك توك في مسرح مصر بيبقى عايز يشتغل وخلاص، بس دي كانت طاقة وليها قيمتها، والأيام دي كنت ببقى مستمتع جدًا.
واختتم عمر مصطفى حديثه قائلاً: “أكيد مكنتش مبسوط وانا بسيب مسرح مصر، وكان لازم قرار ان اسيبهم لأني كنت داخل على فيلم من أحلام حياتي”.
آخر الأعمال الفنان عمر مصطفى
وتجدر الإشارة إلى أن آخر الأعمال التي قد شارك بها الفنان عمر مصطفى متولي فيلم «بنسيون دلال» بجانب مشاركته مع عدد من الفنانين من طاقم العمل وهم بيومي فؤاد، غادة طلعت، خالد سرحان، وليد فواز، محمد رضوان، تأليف حسين نيازي وشادي الرملي، إخراج شادي الرملي.
