انطلقت اليوم امتحانات الفصل الدراسي الأول لعام 2025 في جميع مراحل التعليم، بدءًا من الصفوف الابتدائية وحتى الصف الثاني الثانوي، وسط حالة من التوتر والجدل بين الطلاب وأولياء الأمور.
امتحانات الفصل الدراسي الأول
ورغم تنظيم امتحانات الفصل الدراسي الأول بنظاميها الورقي والإلكتروني، إلا أن الشكاوي تتزايد بشأن اختلاف مستوى صعوبة النماذج الامتحانية وعدم تكافؤ الفرص، فضلاً عن المشاكل التقنية المرتبطة بنظام التابلت في المرحلة الثانوية.
شكاوى أولياء الأمور من اختلاف النماذج
قالت إحدى أولياء الأمور: “نطالب بإلغاء النماذج حرام، مينفعش واحد يكون امتحانه صعب وزميل له في نفس الوقت امتحانه سهل، حسبي الله ونعم الوكيل”.
وأضافت أخرى: “نفسي أعرف مين اخترع حكاية النماذج أ، ب، ج. نموذج سهل والآخر متوسط والثالث صعب، وأنت وحظك، يا غلبان يا ابن الغلبان”.
واشتكت أخرى قائلة: “النماذج المختلفة ظلم كبير على بعض الأولاد، مش كفاية المناهج الصعبة، الامتحانات كمان فيها أجزاء سهلة.. ابني في أولى ثانوي اليوم كانت القطعة صعبة جداً، بينما نموذج آخر كانت القطعة سهلة جداً ده يرضي مين؟ حسبي الله ونعم الوكيل”.
وأشارت أخرى: “لو التطوير بالمنظر ده إحنا مش عاوزينه، حتى التعليم صعبتوه على العيال وكرهتوهم في التعليم، ربنا ينتقم من كل مسؤول بيصعب الحياة على الناس”.
شكاوي أولياء الأمور من نظام التابلت بالمرحلة الثانوية
وقال أحد أولياء الأمور: “صدور التابلت للمرحلة الثانوية قرار خطأ، يعني هو الطالب هيركز في امتحان التابلت ولا امتحان الورق في نفس الوقت؟ ارحموا الطلاب وارحموا أولياء الأمور، وكل نموذج مختلف عن الآخر في الصعب والسهل.. فين بقى التوازن في الامتحانات؟ حسبي الله ونعم الوكيل”.
وأضاف آخر: “هو أنا مش فاهم، إحنا بنسكت على حق ولادنا ليه؟ إحنا بنتعب في زمننا ده عشان مين غيرهم؟ في الآخر قرارات غير مدروسة تطيح بأولادنا ومستقبلهم لنقطة لا يعلم العودة منها إلا الله”.
وقال آخر: “المنظومة كلها فاشلة.. التابلت مش راضي يسلم الامتحان أصلاً، كأنها ممتحنتش أساسًا، ومحدش أداها الامتحان مقالي، وحتى المقالي مفيهوش النص اللي عليه الأسئلة، حسبي الله ونعم الوكيل”.
وقالت وليّة أمر طالب: “يا جماعة ده مش امتحان لطالب عنده 15 أو 16 سنة، بنتي جاية بتموت من العياط، التابلت وجع عينيها بجد. حسبي الله ونعم الوكيل”.
وقال أحد أولياء الأمور: “موضوع تابلت الثانوية العامة موضوع بالفعل غبي جداً.. حضرتك مش قادر توفر ما وعدت به لتطوير التعليم، خلاص أعلن ده بصراحة وقول تم إلغاء فكرة التابلت نهائيًا”.
واستكمل: “مفروض الامتحان يبدأ الساعة 8:30، والسيستم يقع، وتقول لي هنعطيكم ورق لحل الامتحان، مدة الامتحان 3 ساعات، وتمر ساعة، وفي طلاب آخرين بيمتحنوا، أقول عايز ورق علشان أتمتحن، وتقول لي حاضر.. وفي الآخر تجيب لي الورق بعد مرور ساعتين ونصف من الوقت، وإيه امتحان لغة عربية بـ 53 سؤالًا هيتحل إزاي في نصف ساعة؟ نظام زفت حرفيًا”.
وتابع: “يعني إيه امتحان ميفتحش للطلبة على التابلت والسيستم واقع؟ ونص الوقت ضاع في دخول السيستم، ده غير توتر البنات، امتحان عربي يتحل في ساعة إزاي؟ والمدرسين يقولوا لو مسلّمتوش الساعة 3 يبقى راح الامتحان علينا.. ده إحنا لسه في أولها، منظومة التابلت فاشلة.. حسبي الله ونعم الوكيل”.
بدء امتحانات مراحل النقل
بدأت المديريات التعليمية والإدارات في تقييم نحو 20 مليون طالب من الصفوف الابتدائية وحتى الصف الثاني الثانوي العام، وتشمل الامتحانات التي يتم عقدها هذا العام جميع الطلاب في الصفوف من الثالث الابتدائي حتى الثاني الثانوي، حيث تتم عملية التقييم وفقًا لجداول امتحانات الفصل الدراسي الأول.
أما بالنسبة للصفين الأول والثاني الثانوي، فتُعقد امتحاناتهم بنظامين: الورقي والإلكتروني، عبر أجهزة التابلت ومنصة الامتحانات الإلكترونية. وتُجرى الامتحانات في فترتين، صباحية ومسائية، حسب الجداول المقررة لكل مرحلة تعليمية، مع اتخاذ كافة الإجراءات التنظيمية لضمان سير العملية الامتحانية بسلاسة.
ووجهت وزارة التربية والتعليم والتعليم الفني بضرورة التصدي لأي محاولات غش لضمان تكافؤ الفرص بين جميع الطلاب المتقدمين للاختبارات، محذرة من حمل الهواتف المحمولة والأجهزة الإلكترونية التي قد تُستخدم في الغش داخل اللجان الامتحانية.
وأكدت الوزارة أنها ستتخذ الإجراءات اللازمة ضد أي مخالفات يتم رصدها وفقًا للوائح والتعليمات المنظمة لأعمال الامتحانات، مشددة على أهمية الانضباط والالتزام داخل اللجان الامتحانية، مع متابعة دقيقة لمنع أي محاولات غش.
اقرأ أيضًا: «التعليم العالي» تغلق كيانًا وهميًا تحت اسم «معهد الدراسات الإنسانية والعلوم التربوية» بالإسكندرية
