كشفت المخرجة إيناس الدغيدي، عن قصة حبها لزوجها رغم اختلاف ديانته، وقالت: «اتجوزت اللي حبيته وقصة حب 9 سنين وتحديت كل حاجة حتى الدين، وكان مسيحي وأسلم عشاني، ودخلت السينما، وكانوا رافضين عشان الديانة ووالدي كان أستاذ تربية دينية ولغة عربية، مقابلش جوزي لأنه مات بعد زواجي بسنة، وقال مش هقابله عشان أغير دينه ومدخلش بيتنا غير في جنازة أبويا، ومعملتش فرح، عملته في بيتي، وكان عندي بيتي قبل ما اتجوز ومستقلة».
وأضافت الدغيدي، خلال لقائها ببرنامج «أسرار» مع الإعلامية أميرة بدر المذاع عبر قناة النهار: «انا واحدة ربنا خلقها عكس الناس، ومش قاصدة لكن أنا من طفولتي كده، أحنا 8 أخوات أنا عكسهم دايمًا وعلاقتي بيهم حلوة ووالدي توفى راضي عني، ولما بقيت مخرجة قال أنا اللي شجعتها، ووعدته أن التمثيل لا، وأنا دخلت كل الفن بالصدفة، ولا كنت أعرف يعني إيه فن، وحبيت زوجي لحد النهاردة».
وتابعت الدغيدي :«علاقتنا مش بس جواز هي حياة وكان دايمًا ورايا أكون مخرجة، وانفصلنا قبل وفاته، ابتدى يغير مني لما كبرنا، وسيبنا بعض بشياكة، لأن الحياة لوحدك أحلى بكتير، وكل واحد بيبقى له حياته».
